उमेरहदका कारण अवकाशमा जानुपर्ने नियमविरुद्ध पाँच प्रहरी अधिकारीले सर्वोच्चमा दिए निवेदन

१२ भदौ, काठमाडौं । उमेर हदका कारण अवकाशमा जान लागेका प्रहरी अधिकारीहरू सर्वोच्च अदालत पुगेका छन् । उनीहरुले उमेर हदका कारण अवकाश हुने विद्यमान व्यवस्थाविरुद्ध अन्तरिम आदेशको माग गरेका छन् । एक एआईजी र तीन डीआईजीसहित ५ जनाले संयुक्त रुपमा रिट दायर गरेका हुन् ।

प्रहरी अतिरिक्त महानिरीक्षक श्यामलाल ज्ञवालीसहित पाँच जनाले बुधबार सर्वोच्च अदालतमा निवेदन दिएका हुन् । निवेदन दिने अन्य प्रहरी अधिकृतहरूमा प्रहरी नायब महानिरीक्षक यज्ञविनोद पोखरेल, केदार ढकाल, राजेशनाथ बास्तोला र प्रहरी निरीक्षक नागेन्द्र ठाकुर छन् ।

प्रहरी अतिरिक्त महानिरीक्षक ज्ञवाली ५६ वर्षे उमेर हदका कारण भदौ २६ गते अवकाशमा जाँदैछन् ।  अन्य अधिकृतहरू त्यसअघि नै अवकाशमा जान लागेका छन् । उनीहरूलाई प्रहरी किताबखानाले अवकाशको चिठी पठाइसकेको छ । उमेर हदका कारण हुने अवकाशको विषयसमेत सम्बोधन हुनुपर्याे भन्ने माग दाबी गरी दिएको सामूहिक रुपमा निवेदनको बिहीबार पेशी तोकिएको छ । 

यसअघि सर्वोच्च अदालतले ३० वर्षे सेवा अवधिका आधारमा हुने अवकाश कार्यान्वयन नगर्न निर्देशनात्मक आदेश दिएको थियो । सो आदेशविरूद्ध सरकारले भने सर्वोच्चमा भ्याकेट निवेदन दर्ता गराएको छ । २१ जना प्रहरी अधिकृतहरूले ३० वर्षे सेवा अवधि कार्यान्वयन नगराउन अदालत गुहारेका थिए ।