रुपन्देहीमा घटेन तस्करी, एक सातामै ६ सय ३० बोरा अबैध चिनी बरामद

१५ भदौ, भैरहवा । रुपन्देहीमा एक सातामै ३ ट्रक अवैध चिनी बरामद भएको छ । भन्सार कार्यालयबाट खटिएको टोलीले ती सामान नियन्त्रणमा लिएको हो । गत शनिबार लुम्बिनी रोड प्रकटेश्वर मन्दिर जाने बाटोबाट ट्रकसहित करिब २१० बोरा अवैध चिनी बरामद भएको थियो । ग २ ख १२९० नम्बरको ट्रकमा लोड भएको अवस्थामा उक्त चिनी बरामद गरिए पनि चालक फरार भएका थिए । 

बुधवार पनि लुम्बिनी रोड अन्तर्गतकै वेथरीबाट भन्सार छली नेपाल भित्रिएको २ सय १० बोरा चिनी ट्रकमा लोड रहेको अवस्थामा चालकसहित नियन्त्रणमा आयो । लु २ ख २८३६ नम्बरको ट्रकमा उक्त परिमाणको अवैध चिनी ट्रक चालक मायादेवी गाउँपालिका २ तुलसीपुरका शिव कुमार यादवललाई नियन्त्रणमा लिइयो । चामल लोड गरेको बताउने चालकले सामान चेक जाँच गर्दा नेपाली बोरामा चिनी रहेको थियो । 

यस्तै आज शनिबार पनि बिहान २१० बोरा चिनी अवैध चिनी ट्रक सहित बरामद भएको छ । बिहानको २ बजेको समयमा विशेष सूचनाको आधारमा भन्सार प्रमुख सहितको गस्ती टोलीले लुम्बिनी सांस्कृतिक नगरपालिका १० मधुवनीबाट सो सामान बरामद भएको हो । बरामद सामान लैजाँदै गरेको अवस्थामा लुम्बिनी रोड अन्तर्गत पर्ने सो क्षेत्रबाट सशस्त्र प्रहरी बल डण्डाको सुरक्षामा नियन्त्रणमा लिएको हो । 

भैरहवा भन्सार कार्यालयका प्रमुख भन्सार अधिकृत नारद गौतमका अनुसार लु २ ख ५३०५ नम्बरको ट्रकबाट नेपाली बोरामा लोड गरिएको अवस्थामा ७ लाख ८७ हजार ५ सय मूल्य बराबरको चिनी र ट्रक को १६ लाख मुल्यांकन गरि २३ लाख ८७ हजार ५ सय मूल्य बराबरको सामान नियन्त्रणमा लिएको बताए । 

एक साता भित्रै बरामद भएको तीनवटै ट्रक सहितको चिनी उही प्रकृतिको ट्रकमा लोड गरेको अवस्थामा बरामद भएको छ । ट्रकको क्षमता १० टन भएकोले २१० बोरा चिनी लोड भएकै अवस्थामा बरामद भएका छन । स्रोतका अनुसार सीमा क्षेत्रबाट चिनी मोटरसाइकलमा ल्याई डम्पिङ गरि बाहिरी जिल्लामा पठाइने गरिन्छ । यस अघि बरामद चिनी पनि पोखरा लैजाने क्रममा नियन्त्रणमा लिइएको थियो ।