अभिभावकले सहमति जनाएपछि मात्र सरकारले रसिया जाने विद्यार्थीलाई अनुमति दिने

२० भदौ, काठमाडौं । अब देखि रसीया अध्ययनका लागि जाने विद्यार्थीले अनिवार्य रुपमा अभिभावको सहमति देखाउनुपर्ने भएको छ । अभिभावकले प्रतिबद्धता नजाएका विद्यार्थीले सरकारबाट अध्ययन अनुमति पाउने छैनन् । 

बिहीबार सिंहदरबारमा अध्ययनका लागि रसीया जाने तयारीमा रहेका विद्यार्थी र अभिभावकसँग छलफल गर्दै शिक्षा, विज्ञान तथा प्रविधिमन्त्री विद्या भट्टराईले अभिभावकको प्रतिबद्धता आएपछि मात्रै अध्ययनका लागि रसीया जाने तयारीमा रहेका विद्यार्थीहरूलाई अध्ययन अनुमति पत्र दिइने जानकारी गराइन् । 

रसीया र युक्रेनबीचको युद्धका कारण सरकारले रसीया जाने तयारीमा रहेका ४० जना विद्यार्थीको अध्ययन अनुमति पत्र रोकेको थियो । सरकारकै छात्रवृत्तिमा जान लागेका विद्यार्थीहरूलाई अध्ययन अनुमति पत्र दिन मन्त्रालयले अभिभावकको प्रतिबद्धता मागेको हो । 

मन्त्री भट्टराईले रसियमा दुईदेखि ६ वर्षसम्मको कोर्ष रहेकाले विद्यार्थीहरूप्रति सरकार चिन्तित भएको बताइन् । उनले सरकारले अनुमति प्रदान गर्ने तर, त्यसअघि अभिभावक प्रतिबद्धता जानउनुपर्ने र विदेशमा पढिसकेपछि स्वदेश फर्कनका लागि पहल गर्नुपर्ने बताइन् । 

अध्ययन अनुमति पत्र लिएर पढ्न गएका विद्यार्थीहरूको सम्बन्धित देशका राजदूतावासमार्फत आवश्यक रेकर्ड राख्ने उनले बताइन् । छलफलमा सहभागी विद्यार्थी तथा अभिभावकहरूले पढ्न जान लागेका स्थानमा जोखिम नरहेकाले अध्ययन अनुमति पत्र दिन आग्रह गरेका थिए । मन्त्रालयका अनुसार रसीयामा चिकित्सा शिक्षा, इन्जिनियरिङ, सूचना प्रविधि लगायतका क्षेत्रमा पढ्नका लागि ४० जना विद्यार्थीले छात्रवृत्ति पाएका थिए ।