आतंकवादी समूहसँग नेपाल प्रहरीका डीएसपी कसरी जोडिए ?

२२ भदौ, काठमाडौं । पाँच वर्ष अघि कोहलपुर इलाका प्रहरी कार्यालयको प्रमुख हुँदा खसी काण्डमा मुछिएका डीएसपी हेमबहादुर शाही अति आतंकवादी समूहसँग सम्बन्ध रहेको भनिएका महेन्द्रजंग शाहसँग देखिएपछि इन्टरपोलको खोजी सूचीमा परेका छन् । आईएसआईएस जस्तो अति आतंकवादसँग सम्बन्ध रहेका शाह मलेसिया र दुबई आउजाउ गरिरहेका बेला मलेसिया घुम्न गएका शाही र शाहको भेट हुँदा इन्टरपोलको खोजी सूचीमा परेका हुन् ।

प्रहरीको अन्तर्राष्ट्रिय अपराध संगठन (इन्टरपोल) अन्तर्गत नेशनल सेन्ट्रल ब्यूरो (एनसीबी) सिंगापुरको निगरानीमा रहेका शाह सम्बन्ध देखिएका नेपाल प्रहरीका डीएसपी हेमबहादुर शाही अनुसन्धानमा तानिएपछि नेपाल प्रहरीमा समेत हलचल पैदा भएको छ । मलेसियामा रहेका विवादास्पद पृष्ठभूमिका र आतंकवादी क्रियाकलापसँग जोडिएका कालीकोट स्थायी घर भई हाल मलेसियामा रहेका शाहसँग मलेसियासँगै देखिएपछि डीएसपी शाही अनुसन्धानमा तानिएको स्रोतले जनाएको छ । इन्टरपोलको एनसीबीले उनीहरुको सबै विवरण माग गरेपछि अनुसन्धानमा तानिएको खुलेको हो ।

एनसीबीले साउन ९ गते नेपाल प्रहरीलाई पत्राचार गरेपछि यो विषयमा प्रहरी प्रधान कार्यालयले समेत अनुसन्धान गरेको छ । साथै उनको सबै विवरण इन्टरपोललाई पठाइदिएको छ । ‘उनीहरूको गतिविधि के कस्तो छ ? कुनै आपराधिक घटनामा संलग्न भएको जानकारी छ भने उपलब्ध गराइदिनु होला र, आतंकवादमा संलग्न व्यक्ति तथा समूहका लागि आर्थिक गतिविधि गर्ने र सिंगापुरसँग जोडिएको विषयमा जानकारी छ भने त्यो पनि उपलब्ध गराइदिनु हुन अनुरोध छ’, सिंगापुर इन्टरपोलले नेपाल प्रहरीलाई पठाएको पत्रमा उल्लेख छ ।

प्रहरीको अन्तर्राष्ट्रिय अपराध संगठन (इन्टरपोल) को नेशनल सेन्ट्रल ब्यूरो (एनसीबी) सिंगापुरले नेपाल प्रहरीको एनसीबी काठमाडौंलाई पत्राचार गरेपछि प्रधान कार्यालयले पनि आन्तरिक रुपमा अनुसन्धान थालेको छ ।  २९ जुलाई २०२४ मा एनसीबी सिंगापुरले एनसीबी काठमाडौंलाई पत्राचार गरेपछि सबै विवरण पठाएको हो । एनसीबी सिंगापुरले आतंकवादसँग जोडिएर आर्थिक कारोबार गरेको आंशका उनीहरुको विवरण मागेको हो ।

‘आतंककारी गतिविधिमा संलग्न रही ठूलो आर्थिक कारोबार गरिरहेका कालिकोटका महेन्द्रजंग शाह, कालिकोटकै दीपेन्द्रबहादुर शाह, र कैलाली घर भएका हेमबहादुर शाहीको पृष्ठभूमि जानकारी गराउन पत्राचार गरेको थियो’, स्रोतले भन्यो । महेन्द्रजंग शाह गैर–आवासीय नेपाली संघ, मलेसियाको पूर्व अध्यक्ष हुन् । प्रहरी स्रोतका अनुसार, लामो समयदेखि मलेसिया बस्दै आपराधिक क्रियाकलापमा संलग्न रहेको आशंकामा महेन्द्रजंग शाहमाथि अरू देशका प्रहरीले निगरानी गरिरहेको प्रहरीको प्रारम्भिक अनुसन्धानबाट देखिएको छ । दीपेन्द्रबहादुर शाह माओवादी केन्द्रका स्थानीय नेता भएको स्रोतले जनाएको छ । महेन्द्र र दीपेन्द्र नजिकका नातेदार हुन् । दीपेन्द्र गत स्थानीय तह निर्वाचनमा बाँकेको बैजनाथ गाउँपालिका अध्यक्षका उम्मेदवार थिए ।

गत जेठ ३२ गते उनी महेन्द्रकै सहयोगमा १० दिने सिंगापुर भ्रमणमा गएका थिए  । त्यहीबेला उनीहरूबीच मलेसियमा भेट भएको थियो । मलेसियाबाट सिंगापुर जाँदा सीमा क्षेत्रबाट महेन्द्रलाई सिंगापुर अध्यागमनले प्रवेश निषेध गरेपछि उनी इन्टरपोलको खोजी सूचीमा रहेको खुलेको थियो । महेन्द्रजंग शाहको सम्बन्ध रहेको भनेर शंका गरेको अतिवादी संगठन आईएसआईएस हो । आईएसआईएसको पुरा नाम स्लामिक स्टेट अफ इराक एण्ड सिरिया हो । अहिले यसलाई आईएस अर्थात केवल इस्लामिक स्टेट भनेर चिनिन्छ । खाडी मूलुक र अफ्रिकी मूलुकमा आईएसको ठूलो सञ्जाल बिस्तार भइसकेको छ ।

पाँच वर्ष अघि तरुण दलका नेपालगञ्ज नगर सभापति सन्दिपजङ्ग शाह सहित ६ जनालाई नियन्त्रणमा लिएका डीएसपी हेमबहादुर शाही प्रहरी आचरण विपरीतका गतिविधिमा संलग्न भएका थिए । प्रहरी आचरण विपरीत बडाभोजका लागि खसी बोका माग्ने तथा आफूसँग असहमत पक्षलाई गोली हानेर तिघ्रा छेड्ने धम्की दिएको अडियो सार्वजनिक भएको थियो । अहिले उनै डीएसपी मलेसिया र सिंगापुर घुम्न जाँदा महेन्द्रजंग शाहसँग जोडिएका छन् ।