पूर्वश्रीमतीसँग मेरो सम्बन्ध छैन, आफूमाथि लगाइएको आरोपमा संसदीय छानबिन होसः धनराज गुरुङ

२५ भदौ, काठमाडौँ । नेपाली कांग्रेसका उपसभापति धनराज गुरुङले सहकारीको रकम हिनामिनासम्बन्धी आफूमाथि लागेको आरोप असत्य भएको बताएका छन् । उनले आफूमाथि छानबिन गर्न संसदीय छानबिन समिति आवश्यक देखिए बनाएर अनुसन्धान गर्न आग्रह गरेका छन् । 

प्रतिनिधिसभाको विशेष समयमा बोल्दै गुरुङले श्रीमान् या श्रीमती जो कुनै काण्डमा संलग्न भए दोष अर्कोले बोक्न मिल्छ कि मिल्दैन, भूतपूर्व श्रीमान् या श्रीमतीलाई जोड्न मिल्छ कि मिल्दैन ? विवाह गर्नु अपराध हो ? मिल्न नसक्नु अपराध हो ? भन्दै प्रश्न गरेका छन् । 

नेलशन मन्डेलाको पनि सम्बन्ध विच्छेद भएको उदाहरण दिँदै उनले भने, नक्कली भएको बताउनुभएको रहेछ । जसले नक्कली कुरा गर्छ अरुलाई पनि त्यस्तै देख्छ । १० वर्षे बच्चा हुर्काउनुको पीडा म आफैँसँग छ । संसदीय छानबिनका लागि म तयार छु । गुरुङले आफ्नी पूर्व श्रीमती ज्योति गुरुङले सहकारी ठगि गरेको विषयमा आफुलाई जोड्न नहुने बताए ।

सांसद गुरुङले आफूमाथि तत्काल छानबिन अगाडि बढाउन माग गर्दै आफ्नो २०७६ मै निज ज्योतिसँग डिभोर्स भएकाले यस प्रकरणमा आफुलाई जोड्नु गलत भएको बताए । सांसद गुरुङले पुर्व श्रीमती ज्योतिसँग आफ्नो सम्बन्ध खराब भएकै कारणले डिभोर्स गरेको भन्दै नक्कली डिभोर्स भन्दै गरिएको टिप्पणी प्रमाणित गर्न चुनौती दिएका छन् ।

उनले आफुमाथि यसअघि लागेको आरोप पनि छानबिनपछि आरोप्मुक्त भएको बताउदै आफ्नो बारेमा छानबिन गरेर आफूमाथि लागेको आरोपलाई गलत साबित गरिदिन सभामुख र सरकारसँग माग गरेका छन् ।