अस्पताल र विभागका जग्गाको अनधिकृत प्रयोगबारे छानबिन गर्न स्वास्थ्य मन्त्रालयले बनायो समिति

२६ भदौ, काठमाडौं । स्वास्थ्य तथा जनसंख्या मन्त्रालयले आफू मातहतका तर, अरुले प्रयोग गरिरहेका जग्गा फिर्ता ल्याउने भएको छ । मन्त्रालय, विभाग, केन्द्र, अस्पताल र प्रयोगशालाको जग्गाको खोजी गर्न एक समिति गठन गरेको छ । यस्ता जग्गाको संरक्षण तथा उचित व्यवस्थापनका लागि प्रशासन महाशाखा प्रमुखको संयोजकत्वमा समिति गठन गरेर काम थालेको मन्त्रालयले विज्ञप्तिमार्फत जनाएको छ । 
 
मन्त्रालयले मातहतका निकायका नाममा रहेका जग्गाको विवरण, उपयोगको अवस्था समेतका विवरण १५ दिनभित्र पठाउन पत्राचार समेत गरेको प्रवक्ता डा.प्रकाश बुढाथोकीले जारी गरेको विज्ञप्तिमा उल्लेख छ । यो प्रयासलाई सार्थक बनाउन सबै वर्ग तथा क्षेत्रको सहयोग आवश्यक भएको भन्दै मन्त्रालयले यस सम्बन्धमा केही सूचना भए जानकारी गराउन समेत सर्वसाधारणलाई अनुरोध गरेको छ । 

जग्गा अतिक्रमण वा अन्य कुनै तरिकाले दुरुपयोग भएको थाहा भएमा मोवाईल नम्बर ९८५१२६४५५५ वा मन्त्रालयको इमेल ठेगाना  मा पठाई सहयोग गर्न अनुरोध गरिएको विज्ञप्तिमा उल्लेख छ । विभिन्न अस्पतालका जग्गा अनधिकृत रुपमा प्रयोग भइरहेको भन्ने उजुरी आउन थालेपछि मन्त्रालयले छनबिनका लागि समिति बनाएको जनाएको छ ।