प्रधानन्यायाधीश सिफारिस र संवैधानिक परिषदबारे बालुवाटारमा तीन दलका शीर्ष नेताबीच छलफल

२७ भदौ, काठमाडौं । सर्वोच्च अदालतको प्रधानन्यायाधीश सिफारिसमा सहमति खोज्ने विषयमा प्रमुख तीन दलका शीर्ष नेताबीच बिहीबार छलफल भएको छ । प्रधानमन्त्री केपी शर्मा ओलीले प्रधानन्यायाधीश सिफारिस गर्न संवैधानिक परिषदमा देखिएको जटिलता फुकाउन कांग्रेस सभापति शेरबहादुर देउवा र प्रमुख प्रतिपक्ष दलका नेता पुष्पकमल दाहाल प्रचण्डसँग छलफल गरेका हुन् । 

प्रधानमन्त्री ओलीले बुधवार बोलाएको संवैधानिक परिषदको बैठक अन्तिम समयमा स्थगित भएको थियो । उपसभामुख विवाद र प्रचण्ड समेत उपत्यका बाहिर भएकाले परिषद् बैठक स्थगित भएको थियो ।

तीन दलका तीन शीर्ष नेताबीच प्रधानमन्त्री निवास बालुवाटारमा भएको छलफलको निष्कर्ष भने आएको छैन । उपसभामुख इन्दिरा राना मगरको विवाद र राजीनामाका विषयमा पनि छलफल भएको बताइएको छ ।