कोशी सरकारमा कोइराला पक्षले पाएन भाग

२८ भदौ, विराटनगर । नेपाली कांग्रेसले कोशी प्रदेश सरकारमा जाने मन्त्रीहरुको नाम टुंगो लगाएर मुख्यमन्त्रीलाई बुझाएको छ । मन्त्री बन्नेमा शेखर कोइराला पक्षबाट कोही पनि परेका छैनन् । कोशी प्रदेश कोइरालाको गृह प्रदेश हो । विवादकाबीच लामो समयपछि कांग्रेसले मन्त्रीको नाम टुंग्याएको हो । 

आन्तरिक विवादका कारण मन्त्री छान्न नसकेपछि कोशीमा मन्त्रिपरिषद् विस्तार हुन सकेको थिएन । कोशी कांग्रेस संसदीय दलका नेता उद्धव थापाले तीन मन्त्रीसहित एक राज्यमन्त्रीको नाम मुख्यमन्त्री हिक्मत कार्कीलाई शुक्रबार बिहान बुझाएका हुन् ।

जसअनुसार प्रदेश महामन्त्री भूपेन्द्र राईको नेतृत्वमा मन्त्रीहरु सरकारमा जानेछन् । उनले भौतिक पूर्वाधार मन्त्रालय लिने बताइएको छ । भौतिक पूर्वाधार राज्यमन्त्रीमा भूमिप्रसाद राजवंशी छन् । राई र राजवंशी दुवै कृष्ण सिटौला समूहका हुन् ।

उद्योग पर्यटन, वन मन्त्रालयमा सुनसरीका सदानन्द मण्डल छन् । उनी ज्ञानेन्द्रबहादुर कार्की र विजय गच्छेदारको कोटाबाट मन्त्री बनेको दावी गरिएको छ । पार्टी सभापति देउवाको कोटाबाट ताप्लेजुङका खगेनसिङ हाङमाङ उद्योग, कृषि र सहकारी मन्त्री बन्ने भएका छन् । यसमा शेखर कोइराला पक्षको भनिएका कोही पनि परेका छैनन् ।