२०८४ को निर्वाचनमा ओलीको आंकलनः एमालेलाई एकल बहुमत, माओवादीले थ्रेसहोल्डसम्म कटाउला ?

२९ भदौ, काठमाडौं । प्रधानमन्त्री एवं नेकपा एमाले अध्यक्ष केपी शर्मा ओलीले आगामी २०८४ सालको निर्वाचनमा नेकपा माओवादीले राष्ट्रिय पार्टीको मान्यता पाउन (थ्रेसहोल्ड) मुस्किल हुने दावी गरेका छन् । उनले माओवादीले अहिलेदेखि मिहिनेत गरे थ्रेसहोल्डसम्म कटाउन सक्ने बताए । ५ लाख भोट जम्मा गर्न माओवादीलाई मुस्किल हुने ओलीको भनाइ छ । 

शनिवार काठमाडौँमा एमाले कार्यकर्ताहरूलाई सम्बोधन गर्दै उनले नयाँ पार्टीले पनि भोट खाइदिने भएकोले होसियार र सक्रिय हुन आग्रह गरे । एमालेले एकल बहुमत ल्याउने दाबी गरेका ओलीले माओवादी केन्द्रलाई राष्ट्रिय पार्टी बन्न सकस रहेको बताए । अहिले शीतलता, उदासीनता, जिम्मेवारी बोधको कमी र अलिकति भ्रम रहेको बताए ।  

उनले भने, ‘कहिलेकाहीँ हामीलाई कस्तो लाग्छ भने त्यस्तो विकराल परिस्थिति हामीले पास गरेर आयौँ भने अब ढुक्क छौँ भन्ने होइन । हामी कहिले पनि ढुक्कको स्थितिमा रहने होइन । हामीले शक्ति सन्तुलनको अवस्था हेर्नुपर्दछ, त्यो अहिले पनि हाम्रो अनुकूल छैन, त्यसै कारणले हामीले भनेका छौँ, हामी राष्ट्रिय शक्ति त हौँ तर निर्णायक रूपमा राष्ट्रिय शक्तिको रूपमा विकास गर्न सकेका छैनौँ । त्यो तथ्यलाई बुझ्दै निर्णायक राष्ट्रिय शक्तिको रूपमा बुझ्न हामी अगाडि बढ्नुपर्छ ।’ 

जनतामा विश्वास जगाएर अबको निर्वाचनमा पहिलो दल बन्ने गरी अघि बढ्न आग्रह गरे । सबै एकनासको अवस्था नहुने र सधैँ अवसरमा पनि नआउने उल्लेख गरे । उनले भने–‘हाम्रा लागि मिसन ८४ यस्तो निर्णायक बिन्दु हो, हामी सफलता तर्फ, विजयको यात्रा तर्फ अघि बढ्यौँ भने कि हामी निर्णायक अवस्थामा पस्न वा जटिल स्थितिमा फस्न सक्छौँ । मिसन ८४ मा एकल बहुमत ल्याउन सक्ने आधारहरू छन् । त्यतिबेला हामीले सारा शक्ति लगाउनुपर्छ ।’

प्रधानमन्त्री ओलीले नयाँ राजनीतिक दल खानकै लागि जन्मिएको पार्टी भएको बताए । अघिल्लो चुनावमा आफ्ना दलको भोट नयाँ पार्टीले खाएकोले २०८४ सालको चुनावमा सचेत रहन कार्यकर्ताहरूलाई उनले निर्देशन दिए ।  उनले भने–‘हिजोका चुनावमा हाम्रो भोट कहाँ गयो त ? हुँदै नभएका पार्टीहरू जन्मिए, भाँडाको भात छैन खोइ भन्दा ती जन्मिएका खन्चुवाहरूले खाए होला नि । खान जन्मिएकाहरू छन् । अनि तिनका मुखमा गाँस चाहिँ कसरी पस्यो त ? त्यसकारण हामी होसियार हुनुपर्दछ, सक्रिय हुनुपर्दछ ।’ 

उनले अहिले आन्दोलनकारी प्रवृत्ति एकदम घटेको बताउँदै जनताको बहुदलीय जनवादको सरकार भएको उल्लेख गरे । उनले बहुदलीय जनवाद कहिल्यै पुरानो नरहने उल्लेख गरे । राजतन्त्रको पक्षमा यसरी मान्छे बेसरम उफ्रिएको मैले कहिल्यै देखेको थिएन, उनले भने । अहिले सामन्ति, शिरंकुश र अधिनायकवादी राजतन्त्रको पक्षमा यसरी मान्छे बेसरम उफ्रिएको मैले कहिल्यै देखेको छैन । राजतन्त्र हुँदा पनि केही पञ्चहरु भेला हुन्थ्यो अनि कराउँथे । अहिले त्यो भन्दा बढी आशाधारी कराइरहेका छन्, ओलीले भने ।