गुडिरहेको ट्याक्टर सेती नदीमा खस्दा २ जना बेपत्ता, तीन घाइते

२ असोज, बझाङ । बझाङमा ट्याक्टर दुर्घटना भएको छ । पाँच जना सवार ट्याक्टरबाट तीन जना हाम फालेर जोगिएका छन् । दुई जना ट्याक्टरसँगै सेतीमा खसेको र उनीहरू हराएको बताइएको छ । हाम फाल्दा घाइते भएका तीन जनालाई उपचारका लागि जिल्ला अस्पताल लगिएको छ । 

दुर्गाथली गाउँपालिका झनाना बजार नजिकै बुधबार बिहान ट्याक्टर दुर्घटना हुँदा सेतीमा खसेर २ जना बेपत्ता भएको जिल्ला प्रहरी कार्यालय बझाङले जनाएको हो ।

जिल्ला प्रहरी कार्यालय बझाङका प्रहरी निरीक्षक किशोर जोशीका अनुसार ट्याक्टर चालक जाजरकोटको भेरी नगरपालिका–२ का २० वर्षीय सञ्जय बुढासहित २ जना बेपत्ता भएका हुन् । बेपत्ता अर्काको पहिचान खुलेको छैन ।