बाहिर नेपाल बारको धर्ना, भित्रबाट पाण्डे र निरौलालाई सर्वोच्चको न्यायाधीशमा सिफारिस

११ असोज, काठमाडौं । नेपाल बार एशोसिएसनको चेतावनीबीच न्यायपरिषदले सर्वोच्च अदालतको न्यायाधीशमा दुई जनाको नाम सिफारिस गरेको छ । शुक्रबार बसेको परिषदको बैठकले उच्च अदालत पाटनका मुख्य न्यायाधीश नृपध्वज निरौला र उच्च अदालत तुलसीपुरका न्यायाधीश नित्यानन्द पाण्डेयलाई सर्वोच्च अदालतको न्यायाधीशका लागि सिफारिस गरेको हो ।

न्यायाधीशको नाम सिफारिस गर्न न्यायपरिषदको बैठक बसिरहेका बेला प्रधानन्यायाधीश विश्वम्भरप्रसाद श्रेष्ठलाई संविधानमा भएको प्रावधान विपरीत न्यायाधीश सिफारिस नगर्न चेतावनी दिएर बारले धर्ना दिएको थियो । तर, भित्र बसेको बैठकले दुई न्यायाधीश नियुक्तिका लागि सिफारिस गर्यो । 

उच्च अदालतको न्यायाधीशको वरीयतामा न्यायाधीश निरौला एक नम्बर र पाण्डे पाँचौं नम्बर वरीयतामा थिए । बारको विरोध रहेकाले अन्य न्यायाधीशहरूमा भने नाम सिफारिस भएन । कानुन व्यवसायीका तर्फबाट  २ जना र अरु विभागीय गरी पाँच न्यायाधीशका लागि सिफारिस गर्ने न्यायपरिषदको तयारी थियो । 

संसदीय सुनुवाइ समितिबाट नाम अनुमोदन भएमा सर्वोच्चमा सिफारिस भएका निरौला छोटो समयका लागि प्रधानन्यायाधीश बन्नेछन् । ६ पुस, २०९३ मा टेकप्रसाद ढुंगाना अवकाश भएपछि निरौला पुगनपुग दुई महिनाका लागि प्रधानन्यायाधीश बन्ने सम्भावना छ ।