उर्जामन्त्रीको विवादित होटल उद्घाटनमा प्रधानमन्त्रीदेखि कांग्रेस सभापतिसम्म

२४ असोज, काठमाडौं । शिवपुरी जलाधार क्षेत्रमा बनाएको विवादित होटल उद्घाटन गर्न देशका प्रधानमन्त्रीदेखि कांग्रेस सभापतिसम्म पुगेका छन् । वन तथा वातावरण मन्त्रीदेखि सचिवसम्मलाई तर्साएर शिवपुरी राष्ट्रिय निकुन्जभित्रको मध्यवर्ती क्षेत्रमा होटल संचालनको अनुमति लिएका उर्जामन्त्री खड्काको होटल मुलुकका दुई ठूला दलका नेता मात्र होइन प्रधानमन्त्री र पूर्व प्रधानमन्त्री पुगेर उद्घाटन गरी वैधता दिएका छन् ।

देश प्राकृतिक विपत्तिसँग जुधिरहँदा खासै बाहिर ननिस्किएका प्रधानमन्त्री केपी शर्मा ओली र कांग्रेस सभापति बुधबार होटल उद्घाटनमा पुगेका थिए । बूढानीलकण्ठ नगरपालिका–१, मुहानपोखरीस्थित पाँचतारे होटल ‘होलिडे इन’ को बुधबार एक भव्य समारोहबीच प्रधानमन्त्री र नेपाली कांग्रेस सभापति शेरबहादुर देउवाले संयुक्त रुपमा उद्घाटन गरेका छन् । सो होटलका मुख्य मालिक ऊर्जा, जलस्रोत तथा सिँचाईमन्त्री दीपक खड्का हुन् ।

संखुवासभाका खड्का सो होटलका लगानीकर्ता हुन् । जलविद्युतमा ठूलो लगानी गरेका उनीमाथि बैंकको अर्बौं ऋण नतिरेको आरोप लाग्दै आएको छ । करोडौँ मूल्यको लैनचौरिस्थित नेपाल स्काउटको जग्गा र भवन भाडामा अनियमितता गरेको अभियोगसँगै चेक बाउन्सको मुद्दा पनि यथावत छ । सांसद खड्काले पाँचतारे होटलको पूर्वाधार निर्माणअघि वातावरणीय प्रभाव मूल्यांकन (ईआईए) नगराई निर्माण सुरु गरेका थिए । राज्यका निकायको अनुमति नलिई होटल निर्माण गर्ने खड्काले शक्तिको आडमा वन मन्त्री वीरेन्द्र महतो र सचिव दीपक खराललाई धम्की दिएर होटल संचालनको अनुमति लिन सफल भएका थिए ।

शिवपुरी निकुन्जको मध्यवर्ती क्षेत्रको उक्त जग्गामा अरु कसैले इआईए नै नगरी होटल निर्माण गरेको भए उसमाथि कडा कारबाही हुन्थ्यो, तर दीपक खड्काले सयौं रोपनी निकुन्जको जग्गामा इआईए नै नगरी होटल बनाउँदा पनि उनले वन मन्त्रालयका कर्मचारीलाई थर्काएर एक वर्ष अघि अनुमति लिएका थिए । तत्कालीन समयमा इआईए नै नगरी होटल निर्माण गरेपछि कांग्रेस सांसद दीपक खड्काको कम्पनीलाई वन मन्त्रालयले पाँच लाख जरिवाना तिराएको थियो ।

१० हजार वर्गमिटर क्षेत्रफलभन्दा बढीको बिल्डअप एरिया र २० हजार लिटरभन्दा बढी दैनिक भूमिगत पानीको प्रयोग हुने होटल भवन निर्माण गर्दा इआईए समेत नगरी सांसद खड्काले सरकारी ऐन कानुनलाई चुनौती दिएका थिए । २ अर्ब ९७ करोड रुपैयाँ लागतमा होटल निर्माण भएको थियो । खड्काको जलविद्युतसँगै होटल क्षेत्रमा लगानी छ । उनी मेन्चियम हाइड्रोपावर लिमिटेड र होटल इस्टर्न नेपाल प्रालिका अध्यक्षसमेत हुन् ।

ऊर्जा, जलस्रोत तथा सिंचाइ मन्त्री दीपक खड्काले प्रधानमन्त्री केपी शर्मा ओलीलाई पाँचतारे होटलको उद्घाटन गर्न लगाएर त्यही जोशमा नेपाल विद्युत प्राधिकरणका कार्यकारी प्रबन्ध निर्देशक कुलमान घिसिङमाथि प्रहार गरेका छन् ।

मन्त्री खड्काकै लगानीमा बुढानीलकण्ठ–१, मुहानपोखरीमा पाँचतारे होटल ‘फरेष्ट इन ईन’को बुधबार प्रधानमन्त्री केपी शर्मा ओलीले उद्‍घाटन गरे लगत्तै मन्त्री खड्काले विद्युत प्राधिकरणका प्रबन्ध निर्देशक घिसिङलाई १५ बुँदे स्पष्टीकरण सोध्ने निर्णयमा गरेका थिए ।

मन्त्री खड्काले प्राधिकरणको विगत ४ वर्षदेखिको वित्तीय विवरण, ट्रान्सफर्मर खरिदको विवरण, कर्मचारी विवरणलगायतका थुप्रै विषय समेटेर स्पष्टीकरण सोधिएपछि घिसिङलाई वर्तमान सरकारले निकाल्न खोजेको भन्दै सामाजिक सञ्जाल तातिएको छ । स्पष्टीकरणमा घिसिङले ट्रान्सफर्मर खरिद प्रक्रियामा अनियमितता गरेको भनी आरोप लगाइएको छ ।