रवि लामिछानेलाई अदालत हाजिर गराउन पोखराका चोकचोकमा सुरक्षाकर्मी परिचालन

४ कात्तिक, पोखरा । रास्वपा सभापति रवि लामिछानेलाई आज कास्की जिल्ला अदालत उपस्थित गराउनु अघि पोखराको सुरक्षा व्यवस्था कडा पारिएको छ । पोखरा बजारका चोक चोकमा सुरक्षाकर्मी बाक्लो बनाएको छ । सुरक्षा व्यवस्था सामान्य राख्न सुरक्षाकर्मी खटाइएको कास्की प्रशासनले जनाएको छ । 

राष्ट्र बैंक चोकदेखि शहीद चोक, कास्की जिल्ला अदालतसम्म बाक्लो संख्यामा सशस्त्र र नेपाल प्रहरीको टोली परिचालन गरिएको छ । रविको पक्ष र विपक्षमा प्रदर्शन हुँदा सुरक्षा चुनौती बढ्नसक्ने सम्भावना देखिएको छ । सहकारी पीडितहरूले पनि प्रदर्शनको तयारी गरेका छन् । रास्वपाले आफ्ना नेता–कार्यकर्तालाई विरोध प्रदर्शनमा उपस्थित हुन निर्देशन दिएको छ । 

सहकारी पीडितहरूले पनि राष्ट्र बैंक चोकमा उपस्थितिका लागि आह्वान गरेका छन् । यसअघि राष्ट्र बैंक चोकमा सहकारी पीडित र शहीद चोकमा रास्वपा नेता कार्यकर्ता भेला भएर प्रदर्शन गर्ने गरेका थिए । आज यी दुवै चोकमा सुरक्षाकर्मीहरू तैनाथ छन् ।