दल फुटाउने अध्यादेश आउने आशंकामा रहेका विपक्षी दलले आज राष्ट्रपतिको ध्यानाकर्षण गराउने

७ कात्तिक, काठमाडौं । नेकपा माओवादीसहितका विपक्षी दलले आज बुधबार राष्ट्रपति रामचन्द्र पौडेललाई भेटर सरकारका गतिविधिबारे ध्यानाकर्षण गराउने भएका छन् ।  यसका लागि अपरान्ह ४ बजे समय तोकिएको छ । सरकारका काम कारबाही भन्दा पनि प्रधानमन्त्री केपी शर्मा ओलीले दल फुटाउन राजनीतिक दल विभाजनसम्बन्धी अध्यादेश ल्याउने कुराले विपक्षी दल त्रसित छन् । 

राष्ट्रपतिलाई ध्यानाकर्षण गराउन आज अपरान्ह चार बजे शीतलनिवासमा जाने तयारी रहेको माओवादीका एक नेताले जानकारी दिए । यसअघि माओवादी केन्द्र, राष्ट्रिय स्वतन्त्र पार्टी, राष्ट्रिय प्रजातन्त्र पार्टी, एकीकृत समाजवादी पार्टी र आम जनता पार्टीले प्रधानमन्त्री केपी शर्मा ओलीलाई भेटेर ध्यानाकर्षण पत्र बुझाएका थिए ।

प्रचण्डले आज बिहान पार्टी निकट बुद्धिजीवी संगठनका नेताहरूसँगको भेटमा पनि राष्ट्रपतिलाई भेट्न जाने जानकारी गराएका थिए । सरकारका गलत रवैया रोक्न र गर्नुपर्ने काममा ध्यान दिन आग्रह गर्दै पाँच विपक्षी दलहरूले प्रधानमन्त्रीलाई ज्ञापनपत्र बुझाइसकेको उल्लेख गर्दै उनले राष्ट्रपतिलाई भेटेर पनि सरकारका क्रियाकलापको ध्यानाकर्षण गराउने बताएका थिए ।