मोटरसाइकलमा लुकाएको लाखौँको चाँदीको गहनासहित भारतीय पक्राउ

९ कात्तिक, रौतहट । जिल्ला प्रहरी कार्यालय रौतहटको टोलीले लाखौं मूल्य बराबरको अवैध चाँदीको गहना र मोटरसाइकल सहित एकजना भारतीय नागरिक लाई पक्राउ गरेको छ।

पक्राउ पर्नेमा भारत विहार सीतामढी जिल्ला बैरगनिया नगर परिषद ८ असोगीका ६२ बर्षीय चन्देश्वर साह सोनार रहेको जिल्ला प्रहरी प्रवक्ता डीएसपी दीपक कुमार रायले शुक्रवार आज सार्वजनिक गरेका छन् ।

सीमावर्ती भारतीय बजार बैरगनिया बाट विआर ३० एफ ६६३५ नम्बरको मोटरसाईकलमा बिहीवार साँझ आउँदैगरेका साह माथी गौर भन्सार कार्यालय अगाडी शंका लागेर प्रहरीले चेकजाँच गरेको थियो। चेकजाँचको क्रममा उनले मोटरसाइकलको ट्याङ्की मुनी प्लास्टिकमा लुकाएर राखेको कुल ७ लाख ७७ हजार ९२० रुपैयाँ बराबरको 

 ७ किलो १८७ ग्राम चाँदीको विभिन्न किसिमका गहना बरामद गरिएको प्रवक्ता रायले बताएका छन्। गहना र मोटरसाईकल समेतको कुल ८ लाख २७ हजार ९२० रुपैयाँ ८८ पैसा मूल्याङ्कन सहित आज आरोपी साहलाई गहना मोटरसाईकल सहित आवश्यक कारवाहीको लागि जिल्ला भन्सार कार्यालय गौरमा बुझाइएको प्रहरीले जानकारी दिएको छ ।