प्राधिकरणले उद्योगीलाई दियो डेडिकेटेड र ट्रंक लाइनको ५६ किस्तामा बक्यौता बुझाउने सहुलियत

१५ कात्तिक, काठमाडौं । नेपाल विद्युत प्राधिकरणले डेडिकेटेड र ट्रंक लाइनको बक्यौता बुझाउन उद्योगीहरूलाई ५६ महिनाको किस्ता सुविधा दिएको छ । लामो समयदेखि बक्यौता रकम उठाउन सकस परेपछि प्राधिकरणले यस्तो सुविधा दिएको हो । 

प्राधिकरण सञ्चालक समितिको बुधबार साँझ बसेको बैठकले बक्यौता उठाउन पहिलेको तुलनामा किस्ता तिर्ने तालिका दोब्बर बनाउनुका साथै प्रशासकीय पुनरवलोकन गर्न सहज हुने व्यवस्था गरेको हो । प्राधिकरणका प्रवक्ता चन्दनकुमार घोषले ग्राहकलाई अधिकतम सुविधा दिँदै ५६ महिनाको किस्ता सुविधा र कुनै उद्योगी पुनरवलोकनमा जान चाहे ५ प्रतिशत मात्रै पुनरावलोकन धरौटी राख्नुपर्ने निर्णय गरेको जानकारी दिए । 

यसअघि पनि किस्ता सुविधामा बक्यौता बुझाउन चाहने उद्यगीहरूलाई २८ महिना सम्मको सुविधा दिएको थियो । यसअघि प्रशासकीय पुनरवलोकनमा जानुपर्दा ५० प्रतिशतसम्म धरौटी राख्नुपर्ने व्यवस्था गरेको थियो । अब भने ५ प्रतिशत मात्रै तिरेर प्रशासकीय पुनरवलोकन जान सक्ने व्यवस्था गरिएको छ ।