२० एसएसपी बढुवाको दौडधुपमा ३० प्रतिस्पर्धी, दवाव बढाउन शक्तिकेन्द्रमा लाइन लाग्दै प्रहरी अधिकृतहरु

२८ कात्तिक, काठमाडौं । नेपाल प्रहरीमा डीआईजीदेखि एसपीसम्मको बढुवा तयारी भएको छ । प्रहरी प्रधान कार्यालयले एक दुई दिनमै बढुवा समितिको बैठक राखेर बढुवाको तयारी गरेको हो । नेपाल प्रहरीमा सिनियर प्रहरी अधिकृत नायव महानिरीक्षक (डीआईजी)देखि प्रहरी निरीक्षक (इन्स्पेक्टर)सम्म ठूलो संख्यामा रिक्त रहेका पदमा बढुवा तयारी भएको हो  । 

शुरुमा डीआईजी त्यसपछि एसएसपी र एसपीको बढुवा हुने बताइएको छ । बढुवामा सबैभन्दा बढी प्रतिस्पर्धा प्रहरी वरिष्ठ उपरीक्षक (एसएसपी) मै देखिएको छ । अहिले एसएसपीमा २० पद रिक्त रहेका छन् । जसमा ३० भन्दा बढी एसपी प्रतिस्पर्धामा रहेका छन् । प्रतिस्पर्धा चर्को भएपछि बढुवाको दाबेदारहरु अहिले गृहमन्त्री रमेश लेखकको सरकारी निवासमा चर्को भीडभाड रहेको छ । साथै प्रहरी बढुवाको तयारी भएपछि बिचौलियाहरुले पनि मन्त्री निवासमा धर्ना दिन थालेका छन् ।

डीआईजी बढुवा गरेपछि एसएसपीको बढुवा हुने भएको छ । जसमा २०५६ मा प्रहरी निरीक्षक (इन्स्पेक्टर)मा भर्ना भएकाहरू र २०५८ मा इन्स्पेक्टरमा भर्ना भएकाहरू बीचमा प्रतिस्पर्धा हुनेछ । २०५६ मा भर्ना भएकाहरुमध्ये ६ जना अहिले पनि एसपी छन् । जसमा विनोद सिलवाल, गोविन्द अधिकारी, विमलराज कँडेल, तुलबहादुर कार्की, राकेश सिंह र राजीव बस्नेत छन् । उनीहरुमध्ये विमलराज कँडेल विवादित एसपी हुन । उनी  कारबाही भोगेका अधिकृत हुन् । विवादमा तानिएपछि स्याङजाबाट ६ महिनामै कँडेललाई तानिएको थियो । ठाकुरप्रसाद ज्ञवाली प्रहरी महानिरीक्षक (आईजी) भएपछि उनलाई स्याङ्जा पठाइएको थियो ।

यद्यपि उनीहरू पनि २०५८ कै टोलीसँग एसपीमा बढुवा भएका थिए । २०५८ मा इन्स्पेक्टरमा भर्ना भएका ८९ जना पाँच लटमा एसपीमा बढुवा भएका थिए । जसमा पहिलो लटमा २०७५ फागुन ३ गते पहिलो लटमा बढुवा भएका थिए । २०५८ का ब्याचीहरु पहिलो लटमा २०७५ फागुनमा बढुवा हुँदा २०५६ का टोलीका अधिकारी, सिलवाल र कँडेलसँगै बढुवा भएका थिए । कार्की, सिंह र बस्नेत भने २०५८ कै टोलीकाे दोस्रो लटमा २०७७ वैशाखमा हुँदा उनीहरू पनि बढुवा भएका थिए ।

तर २०५८ को ब्याचबाट रमेश थापा पहिलो नम्बरमा बढुवा हुने सम्भावना छ । किनकी उनी अन्नपूर्ण मिडिया नेटवर्कका मालिक तथा वर्तमान गठबन्धनका हर्ताकर्ता क्याप्टेन रामेश्वर थापाका भाई हुन ।  साथै दोस्रो, तेस्रो र चौथो वरियतामा कडा प्रतिस्पर्धा हुने देखिएको छ । २०७५ फागुन ३ मा एसपी बढुवा भएको सूचीबाट विवादमा परेका प्रकाश रानाभाट र कमल थापा छन् ।  रानाभाट र थापा अहिले प्रहरीकै अनुसन्धानमा रहेका छन् । उनीहरू बाहेक जनार्दन जीसी, कृष्ण कोइराला, सन्तोष खड्का, रन्जु सिग्देल, अनुपम शमशेर जबरा, श्यामकुमार महतो, कृष्ण पंगेनी, नवराज अधिकारी र बीरबहादुर बुढा लगायतको टोली बढुवामा पर्ने देखिन्छ ।

त्यस्तै होविन्द्र बोगटी, दयानिधि ज्ञवाली, प्रभु ढकाल, अजय केसी, सन्तोष सिंह राठौर, शान्तिराज कोइराला, वेद विष्ट, राजेन्द्र धमला पनि बढुवाका दाबेदार हुन् । उनीहरू एसएसपी बढुवा सिफारिस भएपछि ३२ प्रहरी उपरीक्षक (एसपी) र ६४ नायब उपरीक्षक (डीएसपी)को पनि पद रिक्त हुनेछ ।