उपनिर्वाचन: कीर्तिपुरको मेयरमा स्वतन्त्रसहित विभिन्न दलले दिए उम्मेदवारी

२ मंसिर, काठमाडौं । काठमाडौंको कीर्तिपुर नगरपालिकाको मेयर पदमा विभिन्न दलको उम्मेदवारले मनोनयनपत्र दर्ता गराएका छन् । नेकपा एमालेले सबै पदमा उम्मेदवारी दिएको छ । राजमान मानवले स्वतन्त्र उमेदवारी दिएका छन् । निर्वाचन अधिकृतको कार्यालयमा आइतबार पुगेर मानवले मनोनयनपत्र दर्ता गराएका हुन् । 

उम्मेदवारी दर्ता गराउन उनीसहित केही समर्थक निर्वाचन अधिकृतको कार्यालयमा पुगेका थिए । सरसफाइ अभियान चलाउँदै आएका उनीहरूले हातमा कुचोसहितका सामग्री बोकेका थिए । स्वतन्त्र उम्मेदवारी दर्ता गराएका राजमान ०६० सालसम्म नेकपा एमालेमा आबद्ध थिए । अहिले उनले स्वतन्त्रबाट मेयर पदमा उम्मेदवारी दिएका हुन् । 

राष्ट्रिय स्वतन्त्र पार्टी (रास्वपा) ले भने कीर्तिपुर नगरपालिका प्रमुखमा उम्मेदवारी नदिने भएको छ । रास्वपा काठमाडौं संयोजक प्रदीप विष्टले नगरपालिका प्रमुखमा उम्मेदवारी नदिने बताए । त्यहाँ कसलाई भोट दिने भन्ने छलफल भइरहेको उनले जानकारी दिए । काठमाडौं महागरपालिका–१६ को अध्यक्षमा भने रोजिना श्रेष्ठलाई उम्मेदवार बनाउने भएको छ । 

मेयर पदका लागि एमालेका तर्फबाट सुरेन्द्र मानन्धरले उम्मेदवारी दर्ता गराएका छन् । कीर्तिपुर–१ को वडाध्यक्ष पदका निम्ति एमालेका तर्फबाट हर्ष महर्जनले उम्मेदवारी दर्ता गराएका छन् । कीर्तिपुर–४ को वडाध्यक्ष पदका निम्ति एमालेका तर्फबाट बद्री बुढाथोकीले उम्मेदवारी दिएका छन् । पार्टीले यसअघि उक्त पदमा उनीहरूलाई उम्मेदवारका रूपमा चयन गरेको थियो ।

राष्ट्रिय प्रजातन्त्र पार्टी (राप्रपा)का तर्फबाट इन्जिनियर ध्रुव महर्जनले मेयरमा उम्मेदवारी दर्ता गराएका छन् । कीर्तिपुर–१ को वडाध्यक्ष पदका निम्ति राप्रपाका तर्फबाट सुरेन्द्र उप्रेतीले उम्मेदवारी दर्ता गराएका छन् । कीर्तिपुर–४ को वडाध्यक्ष पदका निम्ति राप्रपाका तर्फबाट विजेश बस्नेतले उम्मेदवारी दिएका छन् ।

आसन्न उपनिर्वाचनका निम्ति आज बिहान १० देखि अपराह्न ५ बजेसम्म उम्मेदवारको मनोनयनपत्र दर्ता गरिँदै छ । स्थानीय तहका रिक्त ४२ पदका निम्ति यही मंसिर १६ गते मतदान हुँदै छ । आजै साँझ ५ देखि ६ बजेसम्म उमेदवारको सूची प्रकाशन गरिने निर्वाचन आयोगले जनाएको छ ।