सरकारी वकिलको कार्यालयले सीआईबीलाई भन्यो, भैसेपाटी घटनामा एसपी थापामाथि थप अनुसन्धान गर्नु

१० मंसिर, काठमाडौं । युवती प्रयोग गरेर बलात्कार मुद्दामा फसाउन खोजेको भैँसेपाटी घटनामा सरकारी वकिलको कार्यालयले एसपी कमल थापामाथि थप अनुसन्धान गर्न प्रहरीलाई निर्देशन दिएको छ । प्रहरीको केन्द्रीय अनुसन्धान ब्यूरो (सीआईबी) को प्रतिवेदनका आधारमा प्रहरी निरीक्षक (इन्स्पेक्टर) बिनु शाहीसहित ६ जनाविरुद्ध मंगलबार मुद्दा दायर भएको थियो । यसमा एसपी थापाको नाम थिएन । 

प्रहरीकै मिलेमतोमा व्यापारीलाई पक्राउ गरी बलात्कार मुद्दामा फसाउने घटनामा एसपी थापाको पनि हात रहेको भन्दै सरकारी वकिल कार्यालयले उनीमाथि अनुसन्धान हुनुपर्ने बताएको हो । सीआइबीले अनुसन्धान पूरा गरी रायसहितको प्रतिवेदन बुझाएको छ । फरार रहेकी इन्स्पेक्टर बिनुकमारी शाहीसहित ६ जनाविरुद्ध मुद्दा चलाउन सिफारिस गरेको छ । जसमा एसपी थापाको नाम समावेश छैन । 

प्रतिवादी बनाइएका ६ जनाको हकमा आपराधिक लाभ र संगठित अपराधको कसुरमा मुद्दा दर्ता भएको छ । ललितपुर जिल्ला अदालतका न्यायाधीश टेकराज जोशीको इजलासमा उक्त मुद्दाको सुनुवाइ भइरहेको छ । यसमा भैंसेपाटी प्रहरी प्रभागका तत्कालीन इन्स्पेक्टर बिनुकुमारी शाही र दर्शन पोखरेल फरार प्रतिवादी छन् । पक्राउ प्रतिवादीहरूमा भैंसेपाटीकै सहायक हवल्दार महेन्द्र हमाल, सुनसरीको इटहरीका सुष्मा विक, ताज स्लाम र भीमादेवी थापा छन् ।

यसअघि यो घटनाको अनुसन्धान जिल्ला प्रहरी परिसर ललितपुरले गरेको थियो । अनुसन्धानका क्रममा उक्त घटनामा एसपी कमल थापाको समेत संलग्नता देखिएको भन्दै थप अनुसन्धान गर्ने जिम्मा सीआईबीलाई दिइएको थियो । प्रतिवेदन अनुसार हनी ट्रयापमा पीडित व्यवसायी र प्रतिवादी सुष्मा विकबीच गत साउनदेखि नै चिनजान रहेको देखिएको छ । सुस्मा मोरङको एक होटलमा काम गर्थिन् । त्यसपछि उनीहरू नजिकिएका थिए । सुस्मा र पीडित व्यवसायीबीचको सम्बन्ध थाहा पाएपछि ताजको समूहले सुस्मालाई प्रयोग गरेर रकम असुलेको आरोप छ ।

गिरोहसँग शंकास्पद सम्बन्ध देखिएका एसपी कमल थापाको बयान लिए पनि प्रमाण नपुगेको भन्दै उनीविरुद्ध भने मुद्दा नचलाउन सीआइबीको सिफारिस भएको थियो । गत ७ असोजमा प्रहरी प्रभाग भैँसेपाटीमा इटहरीका एक व्यवसायीलाई थुनामा राखी बलात्कार मुद्दामा फसाइदिने भन्दै ३० लाख रुपैयाँ लेनदेन गरी छाडिएको थियो । इटहरीकै सुष्मा विकसँग ती व्यापारी केही महिनाअघि इलाम घुम्न गएका थिए । तिनै युवतीलाई कुटपिटको उजुरी हाल्न लगाई बलात्कार मुद्दा चलाउने भन्दै प्रहरी कार्यालयमै बार्गेनिङ भएको थियो ।

ललितपुर सहकारी वकिल कार्यालयले थापामाथि थप अनुसन्धान गर्न सीआईबीलाई निर्देशन दिइएको हो । सीआईबीले एसपी थापाको हकमा थप अनुसन्धान भइरहेको जनाए पनि प्रतिवेदनमा उल्लेख नगरेपछि शंका गरिएका हो । थप अनुसन्धान गर्ने भनिएकी मनिषा कार्की भने घटनाका मुख्य योजनाकार ताजको प्रेमिका रहेको खुलेको छ । भैंसेपाटी हनीट्रयाप प्रकरणका रुपमा चर्चित यो घटनामा सीआईबीको प्रतिवेदनका आधारमा  अदालतमा मुद्दा दायर भएको हो । यो घटनामा जिल्ला सरकारी वकिल कार्यालय ललितपुरले आपराधिक लाभ र संगठित अपराधको कसुरमा एसपी थापालाई अनुसन्धानबाट नछुटाउन भनेको हो ।