रास्वपाका नेताहरुले गरेको भाषण उतारेर क्लिपसहित अदालतमा पेश गर्न सर्वोच्चको आदेश

१२ मंसिर, काठमाडौं । सर्वोच्च अदालतले राष्ट्रिय स्वतन्त्र पार्टी (रास्वपा)का नेताहरूले गरेको भाषण जस्ताको त्यस्तै उतारेर त्यसको क्लिपसहितका कागजपत्र पेश गर्न आदेश गरेको छ । रास्वपा नेता विरुद्धको रिटमाथि फैसला गर्दै सार्वजनिक रूपमा गरेका भाषण र त्यसको क्लिपसहितका विवरण पेस गर्न भनिएको हो । 

बुधबार न्यायाधीशद्वय मनोजकुमार शर्मा र नृपध्वज निरौलाको संयुक्त इजलासले आदेश गर्दै निवेदकलाई सम्पूर्ण कागजातहरू पेस गर्न भनेको छ । अधिवक्ता अनुपम भट्टराईले दर्ता गराएको अदालतको अवहेलना मुद्दामा संयुक्त इजलासले सुनुवाइ गर्दै यस्तो आदेश गरेको हो । निवेदकले निवेदन साथ पेस गरेको कागजातको पूर्णपाठ तथा भिडियो क्लिप तथा सो भिडियोलाई लिपिबद्ध गरी निवेदकबाट यथाशीघ्र पेस गर्न लगाई नियमानुसार पेस गर्नुहोला, आदेशमा भनिएको छ ।