राम्ररी उपचार गराउनु भन्दै सर्वोच्चले खारेज गरिदियो दुर्गा प्रसाईंको बन्दी प्रत्यक्षीकरण रिट

१२ मंसिर, काठमाडौं । सर्वोच्च अदालतले मेडिकल व्यवसायी दुर्गा प्रसाईंका तर्फबाट दायर भएको बन्दी प्रत्यक्षीकरण रिट खारेज गरिदिएको छ । प्रधानमन्त्रीविरूद्ध अफवाह फैलाएको आरोपमा पक्राउ परेका प्रसाईंको बन्दी प्रत्यक्षीकरण रिट सर्वोच्च अदालतले खारेज गरिदिएको हो । 

विद्युतीय अपराध (साइबर क्राइम) को आरोपमा पक्राउ परेका दुर्गा प्रसाईंले रिहाइको माग गर्दै बन्दीप्रत्यक्षीकरण निवेदन दिएका थिए । न्यायाधीश महेश शर्मा पौडेल र नित्यानन्द पाण्डेयको संयुक्त इजलासले उनको निवेदन खारेज गर्दै रिहा गर्न अस्वीकार गरेको छ । सरकारलाई प्रसाईंको स्वास्थ्य उपचारको व्यवस्था गर्न निर्देशनात्मक आदेश पनि दिएको छ । 

प्रसाईंका छोरा निराजनले उनलाई रिहाइ गर्न माग गर्दै निवेदन दिएका थिए । निवेदनमा प्रसाईंले क्यान्सरको उपचार गराइरहेकाले स्वास्थ्यमा समेत उचित व्यवस्था गर्न माग गरेका थिए । यसअघि पनि उनको माग पछि प्रहरीले उनलाई वीर अस्पताल लगेको थियो । प्रसाईंलाई मंसिर ४ गते पक्राउ गरेर साइबर ब्यूरोले विद्युतीय कारोबारसम्बन्धी कसुरमा अनुसन्धान गरिरहेको छ ।