भारतीय गुण्डा नाइके लरेन्स विश्नोइको नाममा धम्की दिएको आरोपमा झापाका हरिचन्द्र फुँयाल पक्राउ

१४ मंसिर, काठमाडौं । भारतीय गुण्डा नाइके लरेन्स विश्नोइको नाममा नेपालका व्यवसायीलाई धम्क्याएको आरोपमा प्रहरीको केन्द्रीय अनुसन्धान ब्यूरो (सीआईबी) ले झापाबाट एक जनालाई पक्राउ गरी काठमाडौं ल्याएको छ । पक्राउ पर्नेमा झापा घर भएका हरिचन्द्र फुयाँल छन् । पक्राउ परेका फुँयालविरुद्ध आपराधिक विश्वासघातको कसुरमा अनुसन्धान गर्ने सीआईबीको तयारी छ ।

सीआईबीको टोलीले झापाको मेचीनगर–१३ चारआलीबाट उनलाई पक्राउ गरेको हो । पक्राउ परेका फुयाँललाई सीआईबीको कार्यालय लाजिम्पाटमा राखिएको प्रवक्ता तथा एसपी होविन्द्र बोगटीले जानकारी दिएका छन् । उनले भारतमा बसेर नेपालका व्यवसायीलाई फोनमार्फत धम्क्याउने गरेको सीआईबीको दावी छ । उनलाई नेपाल–भारत सिमानास्थित पानी ट्यांकीबाट पक्राउ गरी काठमाडौं ल्याइएको हो । 

फुयाँलले दुर्गा प्रसाईँ नेतृत्वको राष्ट्र, राष्ट्रियता, धर्म, संस्कृति र नागरिक बचाउ महाअभियानलाई सहयोग नगरे सिध्याउँछु भनेर धम्की दिने गरेका थिए । भारतीय गुन्डा नाइके लरेन्स विश्नोईको नाम लिएर नेपाली व्यवसायीलाई धम्कीपूर्ण फोन अझै आइरहेको प्रहरीले जनाएको छ । बैंकर र अन्य व्यवसाय गर्नेहरू मध्येका ६ जनाले आफूलाई धम्कीपूर्ण फोन आइरहेको भन्दै उजुरी दिएको सीआईबीले जनाएको छ । 

विश्नोई अहिले भारतको तिहाड जेलमा छन् । उनीमाथि फिरौती असुली र हत्याको आरोप छ । पहिले उनी महाराष्ट्रको सेन्ट्रल जेलमा थिए । पछि जेलभित्रबाटै गिरोह चलाएको खुलेपछि तिहाड जेलमा सारिएको हो । उनले पटक–पटक भारतीय अभिनेता सलमान खानलाई पनि ज्यान मार्ने धम्की दिने गरेका थिए । सीआईबीले गरेको प्रारम्भिक अनुसन्धानमा भारतबाट मात्रै १४१ वटा कल आएको भेटिएको छ ।