सरेको सरै भयो भाटभटेनीका सञ्चालक गुरुङले एमालेलाई दान दिएको जग्गा विवादविरुद्धको रिट

१६ मंसिर, काठमाडौं । भाटभटेनीका सञ्चालक मीनबहादुर गुरुङले नेकपा एमालेको पार्टी कार्यालय बनाउन दिएको जग्गा दानविरुद्धमा परेको आज पनि हेर्न नभ्याइनेमा परी स्थगित भएको छ । यो मुद्दा लामो समयदेखि सरेको सरेकै छ । जग्गादान विवादको मुद्दा आज पनि हेर्न नभ्याउने हुँदै स्थगित भएको छ । 

सर्वोच्च अदालतका न्यायाधीशद्वय तिलप्रसाद श्रेष्ठ र नित्यानन्द पाण्डेको इजलासमा तोकिएको रिटको पेसी सुनुवाइ हुन नसक्ने भएपछि स्थगित भयो । व्यवसायी गुरुङले दान दिएको जग्गाविरुद्ध सर्वोच्चमा रिट दायर भएको थियो ।  यसअघि मंसिर १० गते पनि यो विवाद न्यायाधीशद्वय तिलप्रसाद श्रेष्ठ र नित्यानन्द पाण्डेको इजलासमा नै पेसी तोकिएको थियो । 

पाँचौँ पटक हेर्न नभ्याउनेमा परेको छ । यसअघि मंसिर २, मंसिर ४, मंसिर ७ र मंसिर १० गते हेर्न नभ्याउने हुँदै स्थगित भएको थियो । २०८१ कात्तिक १२ गते अल्पकालीन अन्तरिम आदेश जारी भएपछि पटक–पटक सुनुवाइको पेसी तोकिए पनि सुनुवाइ हुन सकेको छैन । अधिवक्ता ज्ञानबहादुर बस्नेतले एमालेलाई जग्गा दान दिने निर्णय अन्तरिम आदेशमार्फत बदर गर्न माग गर्दै रिट दायर गरेका थिए ।