प्रयाग अहमदको अध्यक्षतामा मदर्सा बरकतुल उलुमको नयाँ कार्यसमिति चयन

१६ मंसिर, वीरगञ्ज । वीरगञ्ज महानगरपालिका वडा नम्बर ३ छपकैयामा रहेको मदर्सा बरकतुल उलुमको नयाँ कार्यसमिति गठन भएको छ । सर्वसम्मत निर्णयका आधारमा प्रयाग अहमदलाई पुनः अध्यक्ष चयन गर्दै संस्थाको नेतृत्व सुम्पिएको छ ।

२०६४ सालमा जिल्ला प्रशासन कार्यालय पर्सामा दर्ता भएको यो मदर्साले ११ सदस्यीय नयाँ कार्यसमिति चयन गरेको हो । समितिको उपाध्यक्षमा कमरुदिन मिया धोबी, सचिवमा महमद मन्सुर मिया, कोषाध्यक्षमा नुरहोदा अंसारी, सहसचिवमा ईरफान अंसारी र सदस्यहरुमा नैमुदिन मिया धोबी, महमद साहिल, अलियास अंसारी, सतार मिया मंसुरी, खुरसेद आलम हवारी र अलि हुसैन मिया रहेका छन् ।

नयाँ कार्यसमितिले मदर्साको गतिविधिलाई थप व्यवस्थित गर्दै शैक्षिक विकास, धार्मिक तथा सामाजिक कार्यमा महत्वपूर्ण भूमिका खेल्ने विश्वास व्यक्त गरिएको छ ।

गत कार्तिकमा सम्पन्न साधारण सभाबाट नयाँ कार्यसमिति चयन भए पनि केही विवाद उत्पन्न भएको थियो । संस्थाको सदस्यता नभएका व्यक्तिहरुले विवाद उत्पन्न गरेपछि समस्या भएको अध्यक्ष प्रयाग अहमदले जानकारी दिए । उनले नियमअनुसार सदस्यता लिएर प्रक्रिया पूरा गरेर मात्र नेतृत्वका लागि प्रतिस्पर्धा गर्न सकिने स्पष्ट पारे । 

सोहेल अन्सारीले गणपुरक संख्या नपुगी समानान्तर समिति गठन गरी भ्रम फैलाउने प्रयास गरेको प्रति अहमदले आपत्ति जनाएका छन् । उनले आफ्नो नेतृत्वको समिति नै आधिकारिक रहेको र यस्ता भ्रामक गतिविधिमा नपर्न सबैमा आग्रह गरेका छन् ।

मदर्सा बरकतुल उलुम २०६४ सालदेखि विधिवत रूपमा दर्ता भएको संस्था हो । यसले लामो समयदेखि धार्मिक शिक्षा, शैक्षिक सुधार, र सामाजिक गतिविधिमा योगदान पुर्याउँदै आएको छ । नयाँ नेतृत्व चयनसँगै मदर्साको प्रगति र सुधारमा थप गति आउने अपेक्षा गरिएको छ ।