वीरगञ्जको सानो पाइला सहकारी ठगीमा रविसहित तीन जनालाई पक्राउ गर्न प्रहरीले माग्यो अनुमति

१७ मंसिर, वीरगञ्ज । सहकारीको रकम हिनामिना गरेको आरोपमा अनुसन्धानका लागि हिरासतमा रहेका राष्ट्रिय स्वतन्त्र पार्टी (रास्वपा) का सभापति एवं पूर्वगृहमन्त्री रवि लामिछानेसहित जीबी राई र छबिलाल जोशीलाई पक्राउ गर्न प्रहरीले जिल्ला अदालत पर्सासँग अनुमति मागेको छ ।     

जिल्ला प्रहरी कार्यालय पर्साका एसपी कुमोध ढुंगेलका अनुसार अदालतबाट पक्राउ पुर्जी लिएर उनीहरुमाथि अनुसन्धान सुरु गर्ने प्रहरीको तयारी छ । वीरगञ्ज महानगरपालिका वडा नम्बर ६ आदर्शनगरमा रहेको सानो पाइला बचत तथा ऋृण सहकारी संस्थाबाट उनीहरुले रकम लिएको पाइएको छ । अवैध ढंगले गोर्खा मिडिया नेटवर्क प्रालिमा ८ करोड ५८ लाख ४४ हजार रकम लगिएको प्रहरीले जनाएको छ । 

उक्त सहकारीका अध्यक्ष जीबी राई हुन् । पर्सा प्रहरीले गोर्खा मिडियाका प्रबन्ध निर्देशकको हैसियतले लामिछाने, राई र जोशीविरुद्ध पक्राउ अनुमति माग गरी अनुसन्धान अगाडि बढाउन लागेको हो । सहकारी ठगीमा उक्त गिरोहमाथि अनुसन्धान गर्ने पर्सा पाचौं जिल्ला हो । यसअघि उनीहरूमाथि कास्की, रुपन्देही, काठमाडौं र चितवनका विभिन्न सहकारी ठगीमा अनुसन्धान चलिरहेको छ ।

सानो पाइला सहकारीबाट गोर्खा मिडियाको नाममा ग्लोबल आईएमईमा सञ्चालित बैंक खातामा रकम प्रवाह गरिएको विषय संसदीय छानबिन विशेष समितिले पनि उठाएको थियो । २०७८ वैशाखदेखि साउनसम्मको बैंकिङ कारोबारको विवरणमा गोर्खा मिडियामा रकम गएको प्रहरीले पत्ता लगाएको छ । अदालतले उनीहरुविरुद्ध पक्राउ पुर्जी भने जारी गरिसकेको छैन् ।