११ महिनापछि पेशी चढेको रवि लामिछानेको राहदानी दुरुपयोगविरुद्धको रिट हेर्न नभ्याइनेमा

१७ मंसिर, काठमाडौं । राष्ट्रिय स्वतन्त्र पार्टी (रास्वपा)का सभापति एवं पूर्वगृहमन्त्री रवि लामिछानेको राहदानी दुरुपयोग विरुद्धमा परेको रिट सोमबार हेर्न नभ्याइने सूचीमा परेको छ । ११ महिनापछि पेशी चढ्दा पनि यो रिट हेर्न नभ्याइनेमा परेर स्थगित भएको छ ।  

सर्वोच्च अदालतका न्यायाधीशद्वय हरि फुयाँल र नृपध्वज निरौलाको संयुक्त इजलासमा उक्त मुद्दाको पेशी तोकिएको थियो । युवराज सफलले लामिछानेमाथि उक्त विषयमा मुद्दा नचल्ने महान्यायाधिवक्ता कार्यालयको निर्णय बदरको माग गर्दै ०७९ चैत २० गते सर्वोच्चमा रिट दायर गरेका थिए । उक्त रिट सोमबार न्यायाधीश फुयाँल र निरौलाको पेशी सूचीको ३० नम्बरमा परेको थियो ।

 
सर्वोच्चले यसअघि तीनपटक फाइल मगाउने आदेश गरेको थियो । ०७९ चैत २२ मा न्यायाधीश फुयाँलको इजलासले कारण देखाऊ आदेश जारी गरेको थियो । ०८० जेठ १ गते फुयाँलकै इजलासले फाइल मगाउने आदेश गरेपछि पेशी ८ महिना सारिएको थियो । त्यसको झन्डै ११ महिनामा फेरि पेशी चढेर हेर्न नभ्याइने हुँदै स्थगित भएको छ ।