पटक-पटक पेशी तोकिने र हेर्न नभ्याइनेमा पर्दै आएको जग्गादानविरुद्धको रिट अन्तिम सूचीमा

१८ मंसिर, काठमाडौं । भाटभटेनी सुपरमार्केटका सञ्चालक मीनबहादुर गुरुङले नेकपा एमालेलाई पार्टी कार्यालय निर्माणका लागि दान दिएको जग्गा विरुद्ध रिटको आज पनि पेशी चढेको छ । यो मुद्दा पटक-पटक हेर्न नभ्याइनेमा पर्दै आएको छ । आज यस मुद्दाको पेशी सर्वोच्च अदालतका न्यायाधीशद्वय मनोजकुमार शर्मा र नित्यानन्द पाण्डेको इजलासमा तोकिएको छ ।  
 
व्यवसायी गुरुङले एमालेलाई जग्गादान दिएपछि यसविरुद्ध सर्वोच्चमा रिट दायर भएको थियो । २०८१ कात्तिक १२ गते अल्पकालीन अन्तरिम आदेश जारी भएपछि यो मुद्दामा पटक–पटक सुनुवाइको पेसी तोकिए पनि सुनुवाइ हुन सकेको छैन ।  अधिवक्ता ज्ञानबहादुर बस्नेतले एमालेलाई जग्गादान दिने निर्णय अन्तरिम आदेशमार्फत बदर गर्न माग गर्दै रिट दायर गरेका थिए । 
 
मंगलबार दुवै न्यायाधीशको  इजलासमा धेरै मुद्दाको  पेसी परेकाले सुनुवाइ नहुने सम्भावना छ । यसअघि  पनि यो विवाद न्यायाधीशद्वय तिलप्रसाद श्रेष्ठ र नित्यानन्द पाण्डेको इजलासमा पेसी तोकिएर हेर्न नभ्याइने भएको थियो । गुरुङले एमालेको केन्द्रीय कार्यालय बनाउन असोज २५ गते काठमाडौँको कीर्तिपुर नगरपालिका–२, मैत्री नगरमा रहेको १० रोपनी १४ आना जग्गा दान गरेको घोषणा गरेका थिए ।