२०७१ देखि लेखापरीक्षण गर्न नसकेको राष्ट्रिय जीवन बीमा कम्पनीमाथि अर्थले उठायो प्रश्न

१९ मंसिर, काठमाडौं । पछिल्लो ९ वर्षयता लेखापरीक्षण गर्न नसकेको राष्ट्रिय जीवन बीमा कम्पनी लिमिटेडमाथि अर्थ मन्त्रालयले प्रश्न उठाएको छ । अर्थले अबको चार महिनाभित्र लेखापरीक्षण सम्पन्न नगरे अवस्था गम्भीर बन्ने चेतावनी दिएको छ । मन्त्रालयले लेखापरीक्षण सक्न ४ महिनाको समय दिएको छ । 

राष्ट्रिय जीवन बिमा कम्पनी लिमिटेडका पदाधिकारीसहित अर्थ मन्त्रालयमा बुधबार छलफल भएको थियो । सो छलफलपछि मन्त्रालयले ४ महिनाको समयसीमा तोकेर लेखापरीक्षण सक्न भनेको छ । बैठकमा अर्थमन्त्री विष्णुप्रसाद पौडेलले लामो समयसम्म लेखापरीक्षण नहुनु कसैका लागि पनि हितकर नभएको बताए । उनले लेखापरीक्षण सम्पन्न गर्न आवश्यक पर्ने सहयोग उपलब्ध गराउन सरोकारवालालाई निर्देशन दिए । 

राष्ट्रिय जीवन बीमा कम्पनी लिमिटेडको आर्थिक वर्ष २०७१/७२ देखि अन्तिम लेखापरीक्षण सम्पन्न भएको छैन । अन्तिम लेखापरीक्षण सम्पन्न भएपछि मात्र कम्पनीको साधारणसभा गर्न पनि अर्थ मन्त्रालयले निर्देशन दिएको हो । बैठकमा महालेखा परीक्षकको कार्यालय, नेपाल बिमा प्राधिकरण, अर्थ मन्त्रालय, राष्ट्रिय जीवन बीमा कम्पनीका पदाधिकारिहरुको उपस्थिति थियो ।