बालिकालाई यौन दुर्व्यवहार गरेको आरोपमा बिर्तामोडका पूर्वमेयर शिवाकोटी पक्राउ

२४ मङ्सिर, काठमाडौं । बालिकालाई यौन दुर्व्यवहार गरेको आरोपमा झापास्थित बिर्तामोड नगरपालिकाका पूर्वमेयर ध्रुव कुमार शिवाकोटी पक्राउ परेका छन् ।  उनलाई काँकडभिट्टाबाट पक्राउ गरेर इलाका प्रहरी कार्यालय बिर्तामोडमा ल्याइएको जिल्ला प्रहरी कार्यालय झापाले जनाएको छ । 

उनको घरमा कामदारको रूपमा राखिएकी बालिकालाई यौन दुर्व्यवहार गरेको सूचना पाएपछि उनी पक्राउ परेका हुन् ।  बालिकालाई सामाजिक संस्थासँगको सहकार्यमा प्रहरीले काँकडभिट्टाबाट उद्धार गरेको छ । बालिका भारतको आसाम जान लागेकी थिइन् ।

कलेज ड्रेसमा आसाम हिँडेको भेटेपछि सामाजिक संस्थाका प्रतिनिधिले सोधपुछ गर्दा बालिकाले आफूमाथि दुर्व्यवहार भएको बताएकी थिइन् ।  पक्राउ परेका शिवाकोटीमाथि करणी आरोपको विषयमा अनुसन्धान भइरहेको झापा प्रहरीले जनाएको छ ।