जापान जाने तयारीमा रहेकी सुस्मिता जापान फर्कन लागेका युवकसँग होटलमा गएकी थिइन्

१८ पुस, काठमाडौं । काठमाडौंको पिंगलास्थानस्थित बागमती होटलमा मृत फेला परेकी युवती जापान फर्किन लागेका युवकसँग बस्न पुगेको प्रहरीको प्रारम्भिक अनुसन्धानबाट खुलेको छ । अनुसन्धानमा सहभागी एक प्रहरीका अनुसार कागेश्वरी मनोहरा ठेगाना भएकी २२ वर्षीय सुस्मिता खड्काको शव फेला परेपछि अनुसन्धान भइरहेको छ । 
 
प्रहरीका अनुसार खड्का बुधबार साँझ पिंगलास्थानस्थित वाग्मती होटेलको ३०८ नम्बर कोठामा मृत फेला परेकी हुन् । बाहिरबाट कोठा बन्द गरिएको अवस्थामा उनको शव फेला परेको थियो । उनीसँग कोठामा उनका केटा साथी समेत बसेको प्रहरीको अनुसन्धानका क्रममा खुलेको छ । 

मृत्युपछि भने ती युवक चाबी लगाएर भागेको देखिएको प्रहरीले जनाएको छ । सुस्मिता जापान जाने तयारीमा थिइन् । उनी केही दिनअघि मात्र जापानबाट नै नेपाल फर्किएका युवकसँग कोठामा बस्न पुगेको खुलेको छ । फरार युवकको जापान फर्कने मिति बिहीबार (आज) नै देखिएको छ । प्रहरीले उनको खोजी थालेको छ ।

नयाँ वर्षको अघिल्लो दिन उनीहरू सो होटलमा बस्न गएका थिए । भोलिपल्ट ती युवक होटलकै ताला बाहिरबाट लगाएर ‘केहीबेरमा आउँछु’ भन्दै निस्किएका थिए । तर, उनी नफर्केपछि होटल सञ्चालकले प्रहरीलाई खबर गरे । प्रहरीका अनुसार स्थानीय जनप्रतिनिधिसहितको उपस्थितिमा बुधबार दिउँसो ढोका फुटाएर हेर्दा युवतीको शव बेडमा थियो ।