काग्रेसले विभागहरुसँग माग्यो कार्ययोजना, फागुन मसान्तभित्र बुझाइसक्नुपर्ने

१९ पुस, काठमाडौं । नेपाली कांग्रेसले पार्टीका विभागहरू  निष्क्रिय रहेको भन्दै भावी कार्ययोजना प्रस्तुत गर्न विभाग प्रमुखहरूलाई निर्देशन दिएको छ । कांग्रेसका मुख्य सचिव कृष्णप्रसाद पौडेलका अनुसार विभागहरूसँग कार्ययोजना माग्ने र त्यसको अध्ययन गर्ने कामको नेतृत्व महामन्त्री विश्वप्रशकाश शर्मालाई दिएको छ । उनले नै विभागसँग कार्ययोजना लिने र अनुगमन गर्नेछन् । 

महामन्त्री शर्माले विभागहरूसँग यसबारे एक चरण छलफल पनि गरिसकेका छन् । अहिले कांग्रेसका ५६  विभाग बनेका छन् । सभापति शेरबहादुर देउवाले अधिकांशको विभाग प्रमुख तोकिसकेका छन भने ति विभागले आफू अनुकूल सदस्यहरू पनि थप्दै गएका छन् । प्रत्येक विभागमा प्रमुख सहित बढीमा ५१ सदस्यीय बनाउन सकिने विधानको व्यवस्था छ । तर,विभागका सदस्य मनोनीत गर्दा हाललाई १० जनाभन्दा बढी नराख्न निर्देशन दिइएको छ । 

फागुन मसान्तभित्र कार्ययोजना पेश गर्न पार्टीले विभाग प्रमुखहरूलाई निर्देशन दिएको छ । सबै विभागलाई कार्ययोजना ल्याउन भनिएको छ । विभागले गरिरहेका काम, गर्नुपर्ने कार्य, समस्या लगायतका विषयमा कार्ययोजना बनाएर विभाग प्रमुखले पार्टी नेतृत्वलाई बुझाउनुपर्ने छ । गत बुधबार महामन्त्री शर्माले १६ वटा विभागका प्रमुखहरुसँग छलफल गरेका थिए । 

यस्तै कांग्रेसले क्रियाशील सदस्यता नवीकरणका काम चैत मसान्तभित्र सम्पन्न गर्न निर्देशन दिएको छ । शुक्रबार बसेको क्रियाशील सदस्यता व्यवस्थापन समितिको बैठकले कार्यतालिका बनाएरै चैतभित्र क्रियाशील सदस्यता नवीकरण सक्न मातहत निकायहरूलाई निर्देशन दिने निर्णय गरेको हो ।

नयाँ क्रियाशील सदस्यता वितरणका लागि वैज्ञानिक प्रक्रिया अबलम्बन गर्न जातजाति, जनसंख्या, लिंग, पार्टीले प्राप्त गरेको मतको प्रतिशत सन्तुलन हुने गरी प्राविधिक र विज्ञहरूको सहयोगमा समितिले अध्ययन गरी आवश्यक निर्णय लिने भएको छ । कांग्रेसमा महामन्त्री गगन थापाको संयोजकत्वमा केन्द्रीय सदस्यहरू सीता गुरूङ, योगेन्द्र चौधरी र प्रकाश रसाइली (स्नेही) सदस्य रहेको क्रियाशील सदस्यता व्यवस्थापन समिति बनाइएको छ ।