प्रधानमन्त्री ओलीले संसद अधिवेशन नबोलाएर अध्यादेशमार्फत दल फुटाउने नीति लिएः माओवादी

१९ पुस, काठमाडौं । प्रमुख प्रतिपक्षी दल नेकपा माओवादीले दल फुटाउने अध्यादेश ल्याउनका लागि प्रधानमन्त्री ओलीले संसद् बैठक बोलाउन नचाहेको बताएको छ । उसले संसद अधिवेशन डाक्न दवाव सिर्जना गर्ने बताएको छ । शुक्रबार बसेको स्थायी समिति बैठकले संसद् बैठक बोलाउन आनाकानी गर्नुमा प्रधानमन्त्रीको बदनियत हुनसक्ने ठहर गरेको हो । 

सरकारले संसद छलेर दल विभाजनसम्बन्धी अध्यादेश ल्याउन खोजेको माओवादीको निष्कर्ष छ । सरकारको नियत राम्रो देखिएको छैन, सदन छलेर सरकारले अध्यादेश ल्याउन खोज्दैछ । त्यो अध्यादेश पनि केका लागि भन्दा पार्टीहरूलाई विभाजन गर्नका लागि । यो सरकारको गतिविधि हेर्दा लोकतन्त्रमाथि निकै ठूलो समस्या पैदा हुँदैछ । लोकतन्त्रको आत्मा भनेको संसद हो, बैठकपछि उपाध्यक्ष अग्नि सापकोटाले भने ।

यो सरकारको गतिविधि हेर्दा संसद् बोलाउन आनाकानी गर्ने अर्थात् बोलाउन ढिला गर्ने भएको र  लोकतन्त्रमाथि नै गम्भीर समस्या पैदा खतरा बढेको माओवादीको भनाइ छ । अब सबै दलहरूसँग छलफल गरेर संसद् आह्वानका लागि प्रभावकारी रुपमा दबाब चलाउने माओवादीको निष्कर्ष छ । ‘अब हामी सबै पार्टीसित पनि छलफल चलाउँछौं । प्रभावकारी दबाब सिर्जना गर्छौं,’ सापकोटाले भने, ‘समयमै नबोलाउनुमा केही बदनियत छ कि जस्तो हामीलाई लागिरहेको छ ।’