सशस्त्रका डीआईजी धौबजी काठमाडौंमा, सर्लाही र सिराहाको घटनाबारे सोधपुछ

१९ पुस, काठमाडौं । सशस्त्र प्रहरी मुख्यालयले मधेश प्रदेश (छिन्नमस्ता बाहिनी)का डीआईजी कालीदास धौबजीलाई काठमाडौं बोलाएको छ । ८ महिनाअघि गएको वैशाख १८ मा मधेश प्रदेशमा सरुवा भएका धौबजीलाई सर्लाही र सिराहाको घटनालाई लिएर काठमाडौं बोलाएको हो ।

सर्लाहीमा बा प्र ०१–००६ ख २००४ नम्बरको बस अनियन्त्रित भई पल्टिँदा ड्युटीमा रहेका प्रहरी निरीक्षक विजयकुमार तुलाधरको ज्यान गएको र गएको मंसिर १६ गते तस्करीको मदिरा बोकेको गाडीले सिराहाको बडहरी बेस क्याम्पमा कार्यरत सशस्त्र प्रहरी नायब निरीक्षक(सई) लक्ष्मणप्रसाद यादवलाई किचेर मारेको विषयमा बुझ्न भन्दै धौबजीलाई काठमाडौं झिकाएको हो ।

मदिरा तस्करी रोक्न खोज्दा सईलाई भारतीय नम्बरको गाडीले किचेर मारेको थियो । मदिरा तस्करहरूको कनेक्सन बाहिनीपतिसम्म रहेकाले उनलाई छानबिनका लागि तानिएको स्रोत बताउँछ । नेपाल–भारत सीमाक्षेत्र बरियारपट्टी गाउँपालिका–१ कचनारीमा मंसिर १६ गते बिहान मदिरा तस्करले सई यादवको किचेर हत्या गरेका थिए । त्यसैगरी सशस्त्र प्रहरी निरीक्षक तुलाधरलाई किच्ने बसमा भेप भेटिएको थियो । ‘ तुलाधरलाई किच्ने बसभित्र केही कार्टुन भेप समेत भेटिएको थियो’, स्रोतले भन्यो । यो विषयमा सर्लाही प्रहरीले अनुसन्धान गरिरहेको छ

त्यसैगरी गस्तीमा खटिएका यादवले मदिरा बोकेको जिपलाई रोक्ने क्रममा उनलाई ठक्कर दिएर भागेको थियो । सिरहाबाट मदिराको तस्करी ब्यापक हुँदै आएको र बाहिनीमै सेटिङ गरी तस्करी गर्दै आएका थिए । गाडीले ठक्कर दिएर मृत्यु हुनुअघि सई यादवले डीआईजीले मदिरा तस्करी नरोक्न दबाब दिएको कारण दुर्घटना भएको भन्दै सशस्त्र प्रहरीमा गुनासो आएपछि धौबजीलाई झिकाइएको हो । मधेश प्रदेश अन्तर्गतका जिल्लाबाट तस्करी बढेको र राजस्व असुलीमा असर परेको सूचनाका आधारमा धनुषा, बाराका गण र गुल्मदेखि बीओपीको इन्चार्जहरु पनि छानबिनका लागि तानिएका थिए ।

सशस्त्र प्रहरी १२ नम्बर गण बाराका सन्तोष बहादुर सिंह र ८ नम्बर गण धनुषाका दर्शन गिरी तानिएका छन् । तस्करी बढेको व्यापक गुनासोपछि बाराका एसपी सिंहमात्र होइन, २ वटा गुल्मका डीएसपी पनि तानिएका छन् । प्रस्तावित गुल्म मटिअर्वा बाराका डीएसपी बिदुर भट्टराई र पिपरपाती गुल्मका राजीव थापा तानिएका छन् । महोत्तरी सम्सी बीओपीका कृष्णबहादुर गुरुङ, धनुषाको फुलगामा बीओपीका गणेशकुमार बोहरा पनि तानिएका थिए । उनीहरूमाथि अहिले पनि छानबिन चलिरहेको छ ।