माथिल्लो पद मागेपछि एकीकृत समाजवादीमा पेचिलो बन्यो वामदेव बाहेकका नेताको व्यवस्थापनमा

२० पुष, काठमाडौं । नेकपा एकीकृत समाजवादी र नेकपा एकता अभियानबीच हुने भनिएको पार्टी एकता वामदेव बाहेकका नेताको व्यवस्थापनमा पुगेर अड्किएको छ । राष्ट्रिय सभा सदस्य रहेका वामदेव गौतमलाई नेकपा एसमा उनीसँगै आउने नेतालाई कुन पद दिएर मिलाउने भन्ने समस्या अहिलेको हो । गौतम मात्र आउने भए सह अध्यक्ष वा वरिष्ठ नेता जुन पदमा पनि सहमति जुट्ने थियो । 

गौतमले आफूलाई कार्यकारी भूमिका हुने पद मागेपनि त्यसमा ठूलो समस्या नरहेको समाजवादीको नेताहरु बताउँछन् । समस्या छ अरु नेतामा । वामदेवसँग जो नेता छन् उनीहरुको राजनीतिमा खासै हैसियत छैन । तर, उनीहरुले पदाधिकारीदेखि केन्द्रीय सदस्यसम्मका पद मागिरहेका छन् । वामदेव बाहेकका अरु नेतालाई केन्द्रीय सदस्य दिने स्थिति पनि छैन् । सबैलाई माथिको पदमा ल्याउँदा पार्टीभित्र विद्रोह हुने अवस्था छ । 

एकीकृत समाजवादीको विधानमा भने २९९ सदस्यीय केन्द्रीय कमिटी रहने व्यवस्था छ । नेता व्यवस्थापनका कारण कहिलेसम्म एकता हुन्छ भन्ने टुंगो छैन् । नेता गौतमलाई अध्यक्ष माधवकुमार नेपाल र सम्मानित नेता झलनाथ खनालपछि तेस्रो वरीयता दिने सहमति जुटेको छ । गौतमको नाममा सहमति जुटे पनि गौतमसँगै एकीकृत समाजवादीमा आउने अन्य नेताहरूलाई दिने जिम्मेवारीमा भने सहमति जुटेको छैन । 

गौतमसँगका नेताहरूले पार्टी प्रवेश नभई पार्टी एकीकरण गर्न चाहेकाले केन्द्रीय कमिटी लगायतमा सम्मानित स्थान खोजिरहेका छन् । सोही विषयमा छलफल चलिरहेको छ, समाजवादीका एक नेताले बताए । अध्यक्ष माधव नेपाल पनि वामदेवसँग आउने नेतालाई दिने जिम्मेवारीका विषयमा दिनहुँ अरु नेतासँग छलफल गरिरहेका छन तर, निकास निस्किएको छैन् । दुई पक्षका नेताहरूबीच पनि निरन्तर जस्तै छलफल भइरहेको छ ।  

यही पुस ५, १५ र १७ गते गौतम निवास भैँसेपाटी र एकीकृत समाजवादीको कार्यालय आलोकनगरमा एकता प्रक्रियाका लागि भएका छलफल नेताको व्यवस्थापनमै गएर अड्किएका छन् । गौतमले पनि अध्यक्ष नेपाल र आफू एकजुट भएको प्रतिक्रिया दिन थालेका छन् । ‘माधवजी र म एकजुट हुने भइसक्यो । एकताका लागि दुवै पार्टीबिच समझदारी गरेर जाने सहमति भएको छ । तर, समाजवादीका एक नेता भन्छन्, अझ एक महिना भित्रमा पनि एकीकरण टुंगिएला जस्तो छैन् । 

समाजवादीका उपाध्यक्ष जगन्नाथ खतिवडाका अनुसार गौतमसँगको छलफल सकारात्मक छ ।  राजनीतिक, सैद्धान्तिक पक्षमा छलफल निष्कर्ष उन्मुख छन् । संगठनात्मक भन्दा पनि नीतिगत, राजनीतिक र सैद्धान्तिक छलफलमा प्रत्यक्ष निर्वाचित राष्ट्रपति र पूर्ण समानुपातिक निर्वाचित प्रणालीमा जानुपर्ने कुरा भएको छ । गौतमले आफूलाई कार्यकारीसहित वरिष्ठ नेताको जिम्मेवारी दिन प्रस्ताव गरेपनि अहिलेसम्म सैद्धान्तिक वैचारिक साथै नेता व्यवस्थापनमा सहमति जुटेको छैन् । 

गौतमले पुरानो पार्टी एमालेमै फर्कन चाहन्थे । तर, अध्यक्ष केपी शर्मा ओलीले त्यति महत्व दिएनन् । पछिल्लो पटक भएको फोन सम्वादले त झन उनको एमाले फर्कर्ने सोचमै परिवर्तन गरिदियो । एकताका गौतमले आफ्नै बुद्धि कमजोर भएकाले एमालेबाट बाहिर बस्नुपरेको बताएका  थिए । एमाले निर्माणमा ७५ प्रतिशत आफ्नो भूमिका रहेको बताए पनि ओलीले नचाहेपछि अन्त्यमा माधव नेपालतिर गौतम ढल्किएका हुन् । अहिले उनीसँग भएका नेता व्यवस्थापनको विषयले एकिकृत समाजवादीमा पनि यसै भन्न सकिने अवस्था देखिएको छैन् ।