ठगीका विषयले लेखाका सभापति पोखरेलमाथि उठ्यो नैतिक प्रश्नः एकातिर पत्नी, अर्कोतिर स्वकीय सचिव

२० पुष, काठमाडौं । श्रीमती र स्वकीय सचिव विरुद्ध लागेका ठगी आरोपले प्रतिनिधिसभा सार्वजनिक लेखा समितिका सभापति ऋषिकेश पोखरेल माथि नैतिक प्रश्न उठेको छ । उनको राजनीतिक र पदीय हैसियतमै विभिन्न कोणबाट थप प्रश्नहरू उठाइन थालेको छ । यो अवस्थामा उनले सार्वजनिक पदमा बसिरहन नमिल्ने आवाज उठिरहेका छन् । नेकपा माओवादीसहितका प्रतिपक्षी दलले मात्र नभएर सत्ता पक्षबाटै पनि पोखरेल माथि प्रश्न उठाइन थालेको छ । 

पोखरेलकी श्रीमती अञ्जला कोइराला सहकारी ठगी प्रकरणमा मुछिएकी छन् । यही सहकारी प्रकरणमै पोखरेलको राजीनामा माग्न थालिएको थियो । त्यसमाथि स्वकीय सचिवको अर्को काण्डले पोखरेललाई थप विवादमा ल्याएको छ । मोरङको धनपालथान गाउँपालिका–३ को उमा–गौरी सहकारीको रकम अपचलन प्रकरणमा लेखा समिति सभापति पोखरेल पत्नी अञ्जला कोइरालालाई प्रतिवादी बनाएर मुद्दा दायर भएको छ । उनीसहित २५ जनाविरुद्ध मोरङ जिल्ला अदालतले मंगलबार पक्राउ पुर्जी जारी भएपनि कोइरालालाई परार सूचीमा राखिएको छ ।  

श्रीमती सहकारी ठगीमा आरोपित भएपछि पोखरेलले यसको अनुसन्धानमा प्रभाव पार्ने प्रतिपक्ष माओवादी लेखा समितिको सभापतिबाट राजीनामा दिनुपर्ने माग राखेको थियो । अहिले आफ्ना स्वकीय सचिवविरुद्ध यस्तै उजुरी परेको छ । यसमाथि सभापति पोखरेलकै कारण पहिला परेको उजुरीमाथि छानबिन हुन नसकेको कुरा बाहिरिएको छ । स्वकीय सचिव अनिल पोखरेलविरुद्ध एमाले मोरङमा पहिल्यै परेको उजुरी परेको तर, त्यसलाई उनले नै बचाउने काम गरेका थिए । 

यो विषय ऋषिकेश पोखरेल एमाले मोरङ अध्यक्ष भएको समयको हो । उनले पार्टीमा अनिल विरुद्ध परेको मिल्काएर उनलाई बचाएका थिए । अध्यक्ष पोखरेलले उजुरी नसुनी नजरअन्दाज गरेपछि पीडितले अदालतको बाटो रोजेको र अहिले अदालतले दोषी देखाएर पक्राउ गरी छानबिन गर्न आदेश दिइसकेको देखिन्छ । सप्तरी जिल्लाको अग्नीसाइर कृष्णासवरन गाउँपालिका– ५ बकधुवा बस्ने ५७ वर्षीय बौआलाल चौधरीसँग स्वकीय सचिव पोखरेलले पटक–पटक गरी ३८ लाख ८० हजार रुपैयाँ लिएको पीडितको भनाइ छ । 
चौधरीले आफू एमाले नेताबाटै ठगिएको जानकारी गराउँदै २०७८ पुस २७ गते एमाले मोरङमा उजुरी गरेका थिए । स्वकीय सचिव पोखरेल मोरङको रंगेली नगरपालिका–२ का वासिन्दा हुन् । पोखरेलविरुद्ध ३८ लाख ८० हजार रुपैयाँ ठगेको आरोप लागेको छ । घटना सार्वजनिक भएलगत्तै सभापति पोखरेलले स्वकीयलाई पदबाट हटाएका छन् । पोखरेलले स्वकीय सचिवबाट हटाएको पत्र संघीय संसद् सचिवालयलाई शुक्रबार पठाइसकेका छन् । तर, यो ठगीको विषय यहाँसम्म आइपुग्नुमा उनी दोषी देखिएका छन् ।  

उता, धनपालथान गाउँपालिकाको कर्सियास्थित उमा गौरी कृषि सहकारी संस्थामा करोडौं रकम अपचलन गरेको आरोपमा सभापति पत्नी अञ्जला कोइरालाविरुद्ध पनि पक्राउ पुर्जी जारी भएको छ । हाल उनी फरार छिन् । उक्त प्रकरणको छानबिन तथा बयान शुरु नहुँदै पोखरेलका स्वकीय ठगी सम्बन्धी अर्को मुद्दामा तानिएका हुन् । पछिल्लो ठगीको विषयमा समेत अनुसन्धान शुरु गर्न उच्च अदालत विराटनगरले आदेश दिएको छ । दोस्रो प्रकरण बाहिर आएपछि सभापति पोखरेलले पदबाट राजीनामा दिनुपर्ने कुरा जनस्तरबाटै उठेको छ । 

प्रहरी अनुसन्धान प्रतिवेदनका आधारमा सरकारी वकिलको कार्यालयले पोखरेलकी श्रीमती कोइरालासहित १६ जनाविरुद्ध मुद्दा दायर गरेको हो । यसको अनुसन्धानमा पनि पोखरेलले प्रभाव पारेको आरोप छ । अहिले सत्ता नेतृत्वमा नेकपा एमाले नै भएको र पोखरेल सो पार्टीमा नेता समेत भएकाले उनले राजीनामा दिनुपर्ने माग उठेको हो । हाल फरार भनिएकी श्रीमती कोइरालालाई बचाउन सभापति पोखरेलले उनले पठाउँदै आएको विद्यालयलाई पनि धम्की दिएको बताइएको छ । श्रीमतीको नामको निवेदन विद्यालयका प्रधानाध्यापकलाई स्वीकृत गर्न उनले दवाव दिएका थिए । कोइराला विराटनगरको महेन्द्र रात्रि माविकी शिक्षिका हुन् ।

प्रतिवादी बनाएर सहकारी ऐन अन्तर्गत मुद्दा दायर भएपछि कोइराला विद्यालयबाट बिदा लिएर बसेकी थिइन् । उनको बिदा सकिएपछि पोखरेल मार्फत बिदा थपका लागि अञ्जला कोइरालाको पत्र आएको विद्यालयले नै स्वीकार गरिसकेको छ । बिरामी बिदा भन्दै प्राप्त निवेदनमा बिदाको अवधि भने नखुलाई दिएका थिए । यी प्रकरणले गर्दा सभापति पोखरेलमाथि नैतिक प्रश्न उठेको छ । उनका कारण सरकारसमेत विवादमा परेको छ ।