काठमाडौंमा रविविरुद्ध दर्ता हुने मुद्दाको निर्क्योल गर्न महान्यायाधिवक्ता कार्यालयमा छलफल

२१ पुष, काठमाडौं । सरकारी वकिल कार्यालयले काठमाडौंको कालीमाटीस्थित स्वर्णलक्ष्मी सहकारीको रकम हिनामिना सम्बन्धी मुद्दा आइतबार काठमाडौं जिल्ला अदालतमा दर्ता गर्ने भएको छ । जिल्ला प्रहरी परिसर काठमाडौंले बुझाएको अनुसन्धान प्रतिवेदनका आधारमा सरकारी वकिल कार्यालयले अभियोगपत्र तयार पारेको छ । सो अभियोगपत्र दर्ता गर्न लागिएको हो ।  

स्वर्णलक्ष्मी सहकारीबाट पनि गोर्खा मिडियामा गैरकानुनी रूपमा रकम गएको प्रहरीको प्रतिवेदनमा उल्लेख छ । उक्त रकम खर्च गर्ने भूमिकामा रवि लामिछानेसमेत रहेको प्रहरीको निष्कर्ष छ । उनलाई प्रतिवादी बनाएर सहकारी ठगीको मुद्दा चलाउनुपर्ने प्रहरीको राय छ । काठमाडौंमा पनि लामिछानेविरुद्ध सहकारी ठगी, संगठित अपराध र सम्पत्ति शुद्धीकरणको कसुरसमेत अनुसन्धान गरिएको छ । तर, कुन–कुन मुद्दा चलाउने भन्ने विषमा महान्यायाधिवक्ता  कार्यालयमा छलफल भइरहेको छ ।
 
प्रहरीले सो सहकारीमा एक अर्ब १९ करोड हिनामिना भएको भन्दै ४४ जनाविरुद्ध मुद्दा चलाउन सिफारिस गरेको छ । ऋण उपसमिति सदस्य कमल लामा र लेखा समिति सदस्य सुनिता नेवालाई पक्राउ गरी प्रहरीले अनुसन्धान थालेको थियो । संगठित अपराध मुद्दामा ६० दिनभित्र अदालतमा मुद्दा दर्ता गर्नुपर्ने भएकाले प्रहरीले अनुसन्धान प्रतिवेदन बुझाएको हो । सुनितालाई प्रहरीले गत २० कात्तिकमा पक्राउ गरेकाले २० पुसमा ६० दिन पुगेको छ । २० गते शनिबार भएपछि आइतबार मुद्दा दायर हुन लागेको हो । 

बचतकर्ताहरूले एक अर्ब १९ करोड रुपैयाँ ठगी भएको भनेर जाहेरी दिएका छन् । प्रहरीले स्वर्णलक्ष्मी सहकारीको ठगीमा ४४ जनाविरुद्ध अदालतबाट पक्राउ पुर्जी लिइसकेको छ । जसमा पूर्वगृहमन्त्री रवि लामिछाने, पूर्वडिआइजी छविलाल जोशीसमेत छन् । हाल कास्की प्रहरीको हिरासतमा रहेका उनीहरूविरुद्ध काठमाडौंमा पनि मुद्दा दायर हुन लागेको हो । करिब एक महिनाअघि पोखराबाट ल्याएर उनीहरूको प्रहरीले काठमाडौंमा बयान लिएको थियो ।