सुर्यदर्शन सहकारी प्रकरणमा रवि लामिछानेको पक्षबाट १७ जना कानुन व्यवसायीले बहस गर्ने

२२ पुष, पोखरा । पोखराको सूर्यदर्शन सहकारीको बचत हिनामिना प्रकरणमा कास्की जिल्ला अदालतमा जारी प्रतिवादीहरूको थुनछेक बहसमा सोमबार रवि लामिछाने पक्षका वकिलहरूले बहस गर्ने भएका छन् । रविको पक्षबाट बहस गर्न १७ जना कानुन व्यवसायी तयार भएका छन् । 

जसमा पूर्व महान्यायाधिवक्ता समेत रहेका वरिष्ठ अधिवक्ता रमण श्रेष्ठ, वरिष्ठ अधिवक्ताहरू सुशील पन्त, डा. नारायण घिमिरे, नारायणदत्त कँडेल, हरि सुवेदी, रोहितराज बाँस्तोला लगायत १७ जना कानुन व्यवसायीले बहस गर्नेछन् । 

लामिछानेविरूद्ध सुर्यदर्शन सहकारीको ३ करोड ३७ लाख ६५ हजार रकम अपचलन गरेकाले सोही बराबरको बिगो दाबी गरिएको छ । सम्पत्ति शुद्धीकरणतर्फ २७ करोड ८९ लाख ४४ हजार ७०५ रूपैयाँ बिगो दाबी गरिएको छ ।

सहकारी ठगी, संगठित अपराध र सम्पत्ति शुद्धीकरण कसुरमा कास्की अदालतमा सात जनाविरूद्ध गएको मंगलबारदेखि थुनछेक बहस भइरहेको छ । सरकारी वकिल, जाहेरवाला सहकारी पीडिततर्फका वकिलहरूको बहसपछि प्रतिवादीतर्फका वकिलहरूले बहस गरेका थिए । आइतबार प्रतिवादी छबिलाल बन्जाडे जोशीका तर्फबाट वरिष्ठ अधिवक्ता शम्भु थापाले बहस गरेका थिए ।