राज्य व्यवस्था समितिमा ६० बढी उजुरी, हाइप्रोफाइलमा उपसभामुख राना र संसदका महासचिव

२२ पुष, काठमाडौं । राज्य व्यवस्था तथा सुशासन समितिले सोमबार प्रतिनिधिसभाका उपसभामुख र संसद सचिवालयका महासचिव पदमप्रसाद पाण्डेयविरुद्ध परेका उजुरी खोल्ने भएको छ । उनीहरुसहित ६० भन्दा बढी उजुरी समितिमा परेका छन् । ती उजुरीमाथि सोमबार छलफल हुने भएको छ । 

उपसभामुख इन्दिरा राना मगरविरुद्ध मानवबेचखिन सम्बन्धी उजुरी परेको छ भने संसदका महासचिव पाण्डेयविरुद्ध नागरिकतासम्बन्धी उजुरी छ । यस्तै एआईजी श्याम ज्ञावालीविरुद्ध पनि समितिमा उजुरी परेको छ । यी उजुरी आज खोलेर समितिको अधिकारभित्र पर्ने र नपर्ने छुट्याइने भएको छ ।  

समिति सभापति रामहरि खतिवडाले समितिमा ६० भन्दा बढी उजुरी परेको जानकारी दिएका छन् । ती उजुरी आज खोलेर समितिका सदस्यहरूलाई वितरण गर्ने कार्यक्रम । यसपछि उजुरीहरू कुन अधिकार भित्र पर्ने ती उजुरीलाई कसरी सम्बोधन गर्ने भन्ने विषयमा छलफल हुन लागेको हो । समितिको बैठक दिउँसो १ बजे बोलाइएको छ ।