स्यानिटरी प्याडभित्र प्रहरीले कसरी भेट्यो ४३६.१० ग्राम सुन, लुटपाट आरोपमा ३ जना पक्राउ

२२ पुस, काठमाडौं । अवैध रुपमा ल्याइएको सुन लुटपाटमा संलग्न रहेको अभियोगमा प्रहरीले काठमाडौँबाट तीन जनालाई पक्राउ गरेको छ । लुटिएको झण्डै आधा किलो ४३६.१० ग्राम सुन प्रहरीले बरामद गरेको छ । लुटेराहरूबाट प्रहरीले ३ थान मोबाइल र मोटरसाइकल समेत बरामद गरेको छ ।

स्यानिटरी प्याडमा लुकाएर सुन तस्करी गरेको आरोपमा काठमाडौं उपत्यका अपराध अनुसन्धान कार्यालयको टोलीले तीन जनालाई पक्राउ गरेर अनुसन्धान गर्दा महिलाले लगाउने स्यानिटरी प्याडमा लुकाएर सुन तस्करी भएको खुलेको हो । १४ पुसको आइतबार दिउँसो साढे २ बजे फ्लाई दुबईको उडान मार्फत एक महिला त्रिभुवन अन्तर्राष्ट्रिय विमानस्थल ओर्लिएकी थिइन् । पछि ती महिलाले दुबईबाट सुन ल्याएको र उक्त सुन लुटिएको सूचना प्रहरीलाई दिइएको थियो । 

त्यस आधारमा सुन लुटिएको सूचना पाएपछि अपराध अनुसन्धान कार्यालयको टोलीले जिल्ला प्रहरी परिसर भक्तपुरको टोलीसँग मिलेर अनुसन्धान अघि बढाएको थियो । पक्राउ पर्नेमा पञ्चकन्या गाउँपालिका–१ घर भई काठमाडौँको टोखा नगरपालिका–१ झोर बस्दै आएका २६ वर्षीय सुजन नेपाली, सिन्धुपाल्चोक चौतारा साँगाचोकगढी नगरपालिका–३ घर भई काठमाडौँको गोकर्णेश्वर बस्ने ३२ वर्षीया अनिता तामाङ भन्ने मिनसाङ लामा तामाङ र काभ्रेको तेमाल गाउँपालिका–१ घर भई काठमाडौँ महानगरपालिका–६ बस्ने २२ वर्षीय लालबहादुर तामाङ रहेका प्रहरीले जनाएको छ । 

प्रहरीले घटनामा संलग्न भएको आरोपमा उनीहरूलाई काठमाडौँ उपत्यकाका विभिन्न स्थानबाट पक्राउ गरेको हो । पक्राउ परेकाहरूविरुद्ध जिल्ला प्रहरी परिसर भक्तपुरबाट अनुसन्धान अघि बढाइएको अपराध अनुसन्धान कार्यालयले जनाएको छ । अनुसन्धानपछि थप विषया जानकारी हुने प्रहरीको भनाइ छ ।