मधेशको भूमि मन्त्रालयका तत्कालीन सचिव सिंहसहित ८ जनाविरुद्ध भ्रष्टाचार मुद्दा, १ करोड विगो दावी

२२ पुष, काठमाडौं । मधेश प्रदेश सरकारको भूमि व्यवस्था कृषि तथा सहकारी मन्त्रालयका तत्कालीन सचिव डा.नम्रता सिंहसहित ८ जनाविरुद्ध भ्रष्टाचार मुद्दा दायर भएको छ । अख्तियार दुरुपयोग अनुसन्धान आयोगले सो मन्त्रालयका तत्कालीन सचिव डा. सिंहसहित ८ जनाविरुद्ध १ करोड विगो दाबीसहित विशेष अदालतमा भ्रष्टाचार मुद्दा दायर गरेको हो । 

आयोगले  सिंहसहित मन्त्रालयका तत्कालीन वरिष्ठ कृषि अर्थविज्ञ तथा कृषि ज्ञान केन्द्र धनुषाका तत्कालीन कार्यालय प्रमुख शंकरप्रसाद साह, कृषि प्रसार अधिकृत अमरचन्द्र मण्डल, सह–लेखापाल ब्रजेश कुमार साह, युवरानी मत्स्य तथा कृषि फार्म प्रालिका सञ्चालक तथा अध्यक्ष लक्ष्मी नारायण यादव, मन्त्रालयका तत्कालीन पशु चिकित्सक रञ्जितकुमार अधिकारी, कृषि प्रसार अधिकृत अविनाश कुमार झा र कृषि विकास निर्देशनालय धनुषाका तत्कालीन कृषि अर्थविज्ञ विकास कुमार साहविरुद्ध सोमबार विशेष अदालत काठमाडौंमा भ्रष्टाचार मुद्दा दायर गरेको हो ।

नक्कली बिल भरपाईको आधारमा भुक्तानी दिएको र स्पेशिफिकेशन अनुसारको सामान खरिद नगरेको विषयमा आयोगमा उजुरी परेपछि आयोगले अनुसन्धान गरी मुद्दा दायर गरेको आयोगका सहसचिव एवम प्रवक्ता नरहरी घिमिरेले जानकारी दिए । प्रस्ताव छनौट समितिले कृषि ज्ञान केन्द्र र भेटेरिनरी अस्पताल तथा पशु सेवा विज्ञ केन्द्र, महोत्तरीबाट निर्धारित समयमा प्रक्रियामा संलग्न नै नरहेको युवरानी मत्स्य तथा कृषि फार्म प्राली औरही ३, महोत्तरीलाई सहभागी गराउनु भनी तोक आदेश गरेको, प्रस्तावको सूचीमा समावेश गर्नै नमिल्ने फार्मलाई सूचीमा समावेश गर्ने भनी समितिबाट निर्णय गरेको पाइएको छ ।

आर्थिक वर्ष २०७९/०८० मा भूमि व्यवस्था कृषि तथा सहकारी मन्त्रालय मधेश प्रदेश जनकपुरधामका खाद्य सुरक्षा तथा कृषि व्यवसाय प्रवद्र्धन महाशाखाका प्रमुख एवं कृषि ज्ञान केन्द्र धनुषाका प्रमुख वरिष्ठ कृषि अर्थविज्ञले आधारित कृषि पशुपंक्षी तथा मत्स्य विकास कार्यक्रमको रकममा व्यापाक भ्रष्टाचार गरेको, नक्कली बिल भरपाईको आधारमा भुक्तानी दिएको र स्पेशिफिकेसन अनुसारको सामान खरिद नगरेको उजुरीका आधारमा अनुसन्धान गर्दा भ्रष्टाचार ठहरिएका घिमिरेले बताए । 

आयोगले मन्त्रालयकै मधेश प्रदेशका तत्कालीन पशु चिकित्सक रंजितकुमार अधिकारी, कृषि प्रसार अधिकृत अविनाश कुमार झा र कृषि विकास निर्देशनालय, धनुषा मधेश प्रदेशका तत्कालीन कृषि अर्थविज्ञ विकासकुमार साहलाई हुने सजायको आधा सजाय हुन मागदाबी लिएको छ । एक आपसमा मिलेमतो गरी युवरानी मत्स्य तथा कृषि फार्म प्राली औरही ३ महोत्तरीको एउटा मात्र प्रस्तावको लागि पुनः बैठक बसी म्यादपछि प्राप्त हुन आएको युवरानी मत्स्य तथा कृषि फार्म प्राली औरही ३, महोत्तरीको प्रस्तावलाई समेत प्रारम्भिक सूचीमा समावेश गर्ने गरी छनौट गरेको पाइएको छ ।