राज्य व्यवस्था बैठकमा चर्काचर्की, बोल्न रोकपछि थानीले झोक्किएर रामहरीलाई भने तपाई नै सर्वैसर्वा

२२ पुस, काठमाडौं । राज्य व्यवस्था तथा सुशासन समिति सभापति रामहरि खतिवडा र कांग्रेसकै सांसद हृदयराम थानीबीच बोल्ने समयलाई लिएर विवाद भएको छ ।  समितिको सोमबारको बैठकमा सांसद थानी बोलिरहेको बेला सभापति खतिवडाले अवरोध गरेपछि चर्काचर्की परेको हो । आफू बोलिरहेको बेला बीचमै कुरा काटेको भन्दै थानी झर्किएपछि केहीबेर अवस्था असामान्य बनेको थियो ।

समितिमा सभापति खतिवडाले सांसद थानीलाई बोल्नका लागि समय दिएका थिए । थानीले समितिमा प्राप्त उजुरीहरू कसरी पार लगाउने र लामो समयदेखि थन्किएका विधेयकलाई कसरी कानुनको रूप दिने भनेर धारणा राखिरहेका थिए । सांसद थानीले अख्तियार दुरुपयोग अनुसन्धान आयोग (तेस्रो संशोधन) विधेयक पनि संसदीय समितिमा आईसीयूमा पुगेको भनेपछि सभापति खतिवडा बोल्न थालेका थिए । सभापति खतिवडाले उक्त विधेयक आईसीयूमा नपुगेको बताए ।

राज्य व्यवस्था समितिमा अहिलेसम्म प्राप्त उजुरी र निवेदनमाथि सोमबारको बैठकमा छलफल भएको थियो । त्यसक्रममा थानीले भने, ‘तपाईं नै माननीय, तपाईं नै राज्यव्यवस्था समिति, तपाईं नै बोल्नुस् ।’ गृहमन्त्री रमेश लेखकसमेत सहभागी बैठकमा कांग्रेस सांसद थानीले समितिमा आएका उजुरी र निवेदनमाथि छलफलको आँट गरेको उल्लेख गर्दै बोल्न सुरू गरेका थिए ।

राष्ट्रिय रूपमा चर्चित भएर आउने ठूला–ठूला मुद्दाहरू र घटनाबारे तत्काल बोलाएर छलफल गर्दा उचित होला, समितिलाई सुझाव दिँदै सांसद थानीले भने, जस्तो एनसेलको थियो, प्रधानमन्त्रीजी समितिमा आएर कुरा राख्नुभयो । अरू कुरा त हुँदै गर्ला । यस्ता चर्चित विषय उठाउनुपर्ला । सांसद थानीले राज्य व्यवस्थामा अख्तियार, विद्युत प्राधिकरण, गृहलगायत जहाँको उजुरी पनि आउने गरेको पनि बताएका थिए ।

थानीले बोल्ने क्रममा भने, ‘अख्तियारको उजुरी पनि यहीँ, विद्युत् प्राधिकरणको उजुरी पनि यहीँ, गृहको उजुरी पनि यहीँ, सारा संसारभरीको उजुरी राखेर सक्छ त राज्य व्यवस्था समितिले ?’ प्रश्न गर्दै थानीले भने, ‘विधेयक अड्किएर बसिरहेका छन् यहाँ । अँस्ती न्यायपरिषदको विधेयक पास गर्यौं, संसदमा गएर सुतेर बसेको छ । भ्रष्टाचारको पास गर्यौं त्यो पनि जाँदै होला । अख्तियारको यहीँ, म त आईसीयूमा भन्ने गरेको छु, राज्य व्यवस्थामा यहीँ आईसीयूमा सुतिराख्या छ । अरु विधेयकहरु यहीँ छरिएर बसिराख्या छन् ।’ 

भ्रष्टाचार निवारण (पहिलो संशोधन) विधेयकको प्रतिवेदन स्वीकार गरेर समितिबाट विधेयक नै पास गरिसकेको छ भने सँगै आएको अख्तियार विधेयकलाई अगाडि बढाइएको छैन । सोही विषयमा थानीले प्रश्न गरेका थिए । थानीले अख्तियार विधेयकबारे बोल्न थालेसँगै सभापति खतिवडाले भने ’आज उजुरीबारे बोल्नुस्, अख्तियार विधेयक आईसीयूमा गएको छैन’ भनेका थिए । त्यसपछि थानीले बोल्न पाउनुपर्ने बताएका थिए । बोल्नका लागि समय दिएपछि आफूलाई यसअघि पनि सभापतिले बारम्बार अवरोध गर्दै आएको भनेर थानीले जवाफ फर्काएका थिए ।

एमाले सांसद राजेन्द्र राईले सभापति खतिवडालाई सांसद बोलिरहेको बेला नरोक्न भनेका थिए । त्यसपछि समिति सभापति खतिवडाले थानीलाई बोल्न भनेका थिए । तर, थानीले आफू बोलिरहेको बेला बारम्बार अवरोध हुँदै आएको भन्दै थप विषय राख्न अस्वीकार गरे । ’म पनि यो समितिको सभापति भएको मान्छे हो । त्यो कुर्सीमा बसेको मान्छे हो । यो समिति तपाईँकै रहेछ । तपाईँ नै बोल्नुस्,’ थानीले भने ।

त्यसपछि एमाले सांसद कृष्णगोपाल श्रेष्ठले सभापति खतिवडाले बीचमा बोल्न नहुने र समितिलाई राम्रोसँग चलाएर जानुपर्ने बताएका थिए । सांसदले बोल्दा सभापतिले अवरोध गरेमा विषयवस्तुमा छलफल हुन नसक्ने श्रेष्ठको भनाइ थियो । सांसद राईले भने थानीको धारणामा समर्थन जनाएका थिए । अख्तियार विधेयकलाई लिएर सत्तारुढ दलका शीर्ष नेताहरूले असन्तुष्टि जनाएपछि रोकिएको बताइएको छ ।

थानी झन् चर्किए, ‘तपाईंलाई अधिकार छ ? सबै अधिकार तपाईंलाई छ ? जे पायो त्यही बोल्ने, कुरा काट्ने छ ?’ रामहरीले भने काटेको होइन । आईसीयूमा छ भन्नु हुन्छ । लाने हो, सहमतिमै लाने हो । तर थामीले अब नबोल्ने अडान राख्छन्, ‘म बोल्दिनँ भनेपछि अब बोल्दिनँ । भैगो बोल्नुस्, तपाईं । जति बोल्नुहुन्छ, बोल्नुस् । तपाईं नै हुनुहुन्छ सभापति । तपाईंले सबै जान्नुभाछ, तपाईं नै बोल्नुस्, म बोल्दिनँ ।’