राज्य व्यवस्था समितिमा गम्भिर प्रकृतिका ९२ उजुरी, सुनुवाइ सुनिश्चित गर्न उपसमिति बनाइने

२२ पुष, काठमाडौं । प्रतिनिधि सभाअन्तर्गतको राज्य व्यवस्था तथा सुशासन समितिमा गम्भीर प्रकृतिका ९२ वटा उजुरी परेका छन् । यसको अध्ययन र सुनुवाइ सुनिश्चित उपसमिति गठन गरिने भएको छ ।  ५८ वटा उजुरी दर्ता गरिए पनि ३४ वटा अध्ययन प्रक्रियामा रहेको बताइएको छ । 

सोमबार सिंहदरबारमा बसेको समिति बैठकमा सभापति रामहरी खतिवडाले उजुरीहरूको अध्ययन र व्यवस्थापनका लागि उपसमिति गठन गरेर अघि बढ्ने निर्णय गरिएको बताए । कतिपय उजुरीहरू समितिको कार्यक्षेत्रमा नपर्ने भएकाले नियमावलीअनुसार मात्र सुनुवाइ प्रक्रिया अघि बढाउन उपसमिति बनाइन लागेको हो । 

कतिपय उजरी सर्वसाधारणबाट पनि प्राप्त भएका छन् । बैठकमा अधिकांश सांसदहरूले उजुरीहरूको व्यवस्थित अध्ययन गर्न उपसमिति गठनको आवश्यकता रहेको औंल्याएका थिए । उपसमितिले उजुरीहरूको समीक्षा गरी समितिको कार्यक्षेत्रभित्र पर्ने उजुरीहरूमा सुनुवाइ प्रक्रिया अघि बढाउने सुझाव सांसदहरूको छ ।