नेपालमा अहिलेसम्म क्षतिको विवरण आएको छैन, भूकम्प ७ म्याग्निच्युडको होकि ६.८ को ?

२३ पुस, काठमाडौं । मंगलबार बिहान गएको भूकम्पमा परी चीनमा कम्तिमा ९ जनाको मृत्यु भएको छ र धेरै भौतिब क्षति भएको चीनको सरकारी टेलिभिजन च्यानल सीजीटीएनले जनाएको छ । नेपालमा भने अहिले सम्म क्षतिको विवरण नआएको प्रहरीले जनाएको छ । चीनमा ९ जनाको मृत्यु भएको सरकारी अधिकारीहरुलाई सम्बोधन गर्दै सीजीटीएनले जनाएको छ ।

आज बिहान नेपाली समय अनुसार ६ बजेर ५० मिनेटमा चीनको जिजांग प्रान्तको सिगात्सेस्थित दिंगी गाउँमा केन्द्रविन्दु भएर शक्तिशाली भूकम्प गएको थियो । भूकम्पको धक्का नेपालमा पनि ठूलै परेको थियो । नेपालको भूकम्प मापन केन्द्रले ७ म्याग्निच्युडको भूकम्प गएको रेकर्ड राखे पनि चीनको भूकम्प नेटवर्क केन्द्रले ६.८ तीव्रता मापन गरेको छ । यो भूकम्प १० किलोमिटर गहिराइमा थियो । चीनको भूकम्प नेटवर्क केन्द्रका अनुसार आज बिहानको भूकम्प सबैभन्दा शक्तिशाली हो । 

नेपालमा भने देशका कुनै ठाउँबाट मानवीय वा भौतिक क्षति भएको विवरण नआएको नेपाल प्रहरीले बताएको छ । नेपाल प्रहरीका केन्द्रीय प्रवक्ता तथा सूचना अधिकारी प्रहरी वरिष्ठ उपरीक्षक विश्व अधिकारीका अनुसार देशभर प्रहरी परिचालन गरेर घटनाको जानकारी संकलन गर्ने काम भइरहेको छ ।

अहिलेसम्म कुनै पनि मानवीय वा भौतिक क्षतिको विवरण प्राप्त भएको छैन । जानकारी तथा सूचना संकलनको काम जारी छ ।  भूकम्पको झट्कापछि नागरिकमा केहीबेर त्रास फैलिएको भए पनि अहिलेसम्म देशभरबाट कुनै ठूलो क्षतिको रिपोर्ट प्राप्त नभएको प्रहरीले जनाएको छ । हालसम्म ६ वटा परकम्प गइसकेको छ भने ४ म्याग्निच्युडभन्दा माथिका ६ वटा परकम्प गएको बताइएको छ ।