भूकम्पबाट चीनमा कम्तिमा ३२ जनाको मृत्यु, ३८ घाइते

२३ पुस, काठमाडौं । नेपाल–चीन सीमा क्षेत्रमा गएको भुकम्पबाट तिब्बतमा ३२ जनाको मृत्यु भएको छ। भूकम्पमा परी ३२ जनाको ज्यान गएको र ३८ जना घाइते भएको चिनियाँ सञ्चारमाध्यम सिन्ह्वाले जनाएको छ ।  चिनियाँ सञ्चार माध्यमहरुका अनुसार भूकम्पका कारण दिङ्गी काउन्टीको चाङ्गसुओ क्षेत्रका गाउँमा घरहरु भत्किएका छन् ।

आज बिहान नेपाली समय अनुसार ६ बजेर ५० मिनेटमा चीनको जिजाङ्ग प्रान्तको सिगात्सेस्थित दिङ्गी गाउँमा केन्द्रविन्दु भएर शक्तिशाली भूकम्प गएको थियो । भूकम्पको धक्का नेपालमा समेत महसुस भएको थियो । नेपालको भूकम्प मापन केन्द्रले ७ म्याग्निच्युडको भूकम्प गएको रेकर्ड राखे पनि चीनको भूकम्प नेटवर्क केन्द्रले ६.८ तीव्रता मापन गरेको छ । यो भूकम्प १० किलोमिटर गहिराइमा थियो ।