अदालतको अपहेलनासम्बन्धी मुद्दामा बार अध्यक्ष घिमिरेको विवादित अडिओ झिकाउन आदेश

२३ पुष, काठमाडौं । सर्वोच्च अदालतले अदालतको अपहेलनासम्बन्धी नेपाल बार एसोसिएसनका अध्यक्ष गोपालकृष्ण घिमिरेविरुद्ध दर्ता भएको मुद्दामा उनले बोलेको अडियो झिकाउने आदेश दिएको छ । मंगलबार न्यायाधीशद्वय नहकुल सुवेदी र अव्दुल अजिज मुसलमानको इजलासले उक्त आदेश गरेको हो ।

यो मुद्दाको पशी एक नम्बरमै परेको थियो । बारेले भने ५० जना कानुन व्यवसायी उपीसथत गराएर  बहश गर्ने तयारी गरेको थियो । सर्वोच्चका उपरजिस्ट्रार गोविन्दप्रसाद घिमिरेले उठाएको प्रतिवेदनका आधारमा बार अध्यक्ष घिमिरेविरुद्ध असोज १४ गते अदालतको अवहेलना मुद्दामा कारबाही अघि बढाएको थियो ।

न्याय परिषद्ले गत असोज ११ गते सर्वोच्च अदालतमा दुई जना न्यायाधीश नियुक्तिका लागि सिफारिस गरेपछि अध्यक्ष घिमिरेले लेनदेनका आधारमा यो निर्णय भएको आरोप लगाएका थिए । यसपछि सर्वोच्चमा रिट दर्ता भएको थियो । यसअघि घिमिरेसँग लिखित जवाफ माग गरिएको थियो भने उनले त्यसको जवाफ पनि फर्काइसकेका थिए । अब बोलेको सामाग्री उपलब्ध गराउनु पर्नेछ ।