सहकारी ठगीमा मुछिएकी लेखा समिति सभापति पोखरेलकी पत्नी कोइराला अदालतमा हाजिर

२४ पुष, विराटनगर । मोरङको धनपालथान–४ मा रहेको उमा गौरी कृषि सहकारीको रकम अपचलनमा आरोपित अन्जला कोइराला बुधबार अदालत हाजिर भएकी छन् । पुस २ मा पक्राउ पुर्जी जारी गरेपछि फरार थिइन् । कोइरालाको अदालतमा थुनछेक बहस सुरू हुनेछ ।

उनी हाजिर भएसँगै बयान गराएर थुनछेक आदेश गर्ने अदालतको तयारी छ। जिल्ला अदालत उद्धव प्रसाद भट्टराईको इजलासमा उनको बयान र थुनछेक बहस हुने अदालतका सूचना अधिकारी हेमबहादुर बुढाथोकीले जानकारी दिए।
 
कोइराला प्रतिनिधि सभाको सार्वजनिक लेखा समितिका सभापति ऋषिकेश पोखरेलकी श्रीमती हुन् । सहकारीका अध्यक्ष शम्भु रौनियार, अन्जला, रंगेली २ का वडाध्यक्ष सन्तलाल खवाससहित २६ जनाविरूद्ध अदालतले पक्राउ पुर्जी जारी गरेको थियो । वडाध्यक्ष खवास ५ लाख धरौटीमा रिहा भइसकेका छन् ।

सोही प्रकरणमा नाम जोडिएकी कोइराला बुधबार बिहान अदालत खुल्ने समयमै हाजिर भएकी हुन् । विराटनगरस्थित महेन्द्रविराट रात्री विद्यालयकी शिक्षक कोइराला अदालतको पक्राउ पुर्जीपछि विद्यालयमा विदा लिएर फरार थिइन् । उनका श्रीमान पोखरेलले सहकारी प्रकरणमा मुछिएका परिवारका सदस्यले छनबिनमा सघाउने बताउँदै आएका थिए ।