ठूला दलका मुख्य सचेतकसहित गृहमन्त्री जोडिएको अवहेलनासम्बन्धी मुद्दा हेर्न नमिल्नेमा राखियो

२४ पुष, काठमाडौं । संघीय सांसदले इच्छाअनुसार खर्च गर्न पाउने पूर्वाधार विकास कार्यक्रमका विषयमा अदालतको अपहेलना हुने गरी कार्य गरेको भन्दै गृहमन्त्री रमेश लेखकसहित ५ जना सांसदविरुद्ध सर्वोच्च अदालतमा दर्ता भएको मुद्दा पेशी चढेर हेर्न नमिल्नेमा परेको छ । 
 
बुधबार न्यायाधीशद्वय अब्दुल अजीज मुसलमान र नित्यानन्द पाण्डेयको संयुक्त इजलासमा यसको पेसी तोकिएको थियो । अधिवक्ता यज्ञप्रसाद अधिकारीले गृहमन्त्रीसमेत रहेका प्रतिनिधि सभा सदस्य रमेश लेखकसहित सांसदहरू श्यामकुमार घिमिरे, सुर्यबहादुर थापा क्षेत्री, अमरबहादुर थापा र महेशकुमार बर्तौलाविरुद्ध अवहेलना मुद्दा दायर गरेका थिए ।

उनीहरूले पूर्वाधार विकास कार्यक्रम कार्यान्वयन नगर्न सर्वोच्च अदालतले दिएको अन्तरिम आदेशका विरुद्ध असन्तुष्टि जनाउँदै संसदमा आफ्नो धारणा राखेका थिए । यसविरुद्धको रिट निवेदनमा बुधबार पेसी तोकिए पनि हेर्न नमिल्ने भएको छ ।  घिमिरे नेपाली कांग्रेसका मुख्य सचेतक हुन भने बर्तौला एमालेका मुख्य सचेतक हुन् ।