सुर्यदर्शन सहकारी ठगी प्रकरणमा प्रतिवादी तर्फको सकेर जाहेरवालका तर्फबाट जवाफी बहस सुरु

२४ पुष, पोखरा । कास्की जिल्ला अदालतमा प्रतिवादी तर्फको बहस सकिएर जाहेरवालका तर्फबाट जवाफी बहस सुरु भएको छ । सूर्यदर्शन सहकारी ठगी प्रकरणमा अदालतमा उपस्थित सबै अभियुक्तहरूको तर्फबाट बहस सकिएर जवाफी बहस सुरु भएको हो । 

जिल्ला अदालत, कास्कीका न्यायाधीश नीतिज राईको इजलासमा पुष १६ देखि थुनछेक बहस सुरु भएको थियो । जसमा जाहेरवाला, सरकारी वकिल र प्रतिवादीका तर्फको एकसरो बहस सकिएको हो । बुधबार जाहेरवालका तर्फबाट जवाफी बहस सुरु भएको जिल्ला सरकारी वकिल कार्यालय प्रमुख कमला काफ्लेले  जानकारी दिइन् । उनका अनुसार, सरकारी वकिलको जवाफी बहस भने बिहीबार हुनेछ ।

बहस सकिएपछि इजलासले थुनामा पठाउने कि बाहिरै बसेर मुद्दाको प्रतिवाद गर्न दिने भन्ने आदेश गर्नेछ । रास्वपा सभापति एवं पूर्वगृहमन्त्री रवि लामिछानेसहित पूर्वडीआईजी छविलाल बन्जाडे जोशी, लीला पछाईं, रामबहादुर खनाल, पूर्वसांसद मीना गुरुङ, कृष्णबहादुर गुरुङ र आरती गुरुङलाई अदालतमा अभियोगपत्रसाथ उपस्थित गराइएको छ ।

विभिन्न संस्थासहित ४४ जना प्रतिवादी बनाइएकामा सहकारी ठगीमा ३१ जनालाई प्रतिवादी बनाइएको छ । उनीहरूबाट एक अर्ब ५१ करोड ४० लाख रूपैयाँभन्दा बढी बिगो माग गरिएको छ । रविसहित १९ जनालाई संगठित अपराध, ४ जनालाई सम्पत्ति शुद्धीकरण र २ जनालाई क्रिप्टोको कसुरमा समेत अभियोग पत्र दायर गरिएको छ ।