मातहतका निकायलाई दवाव दिने गरी कानुन परिवर्तन गर्न पर्यटनमन्त्रीले खोजे कांग्रेस र एमालेको साथ

२४ पुस, काठमाडौं । काम गर्न असहज भएको भन्दै संस्कृति, पर्यटन तथा नागरिक उडड्यनमन्त्री बद्री पाण्डेले मन्त्रालय मातहत केही कानुन परिवर्तन गर्ने तयारी गरेका छन् । यसका लागि उनले सत्तारुढ दल नेपाली कांग्रेस र नेकपा एमालेको साथ खोजेका छन् । मन्त्रालयका अप्ठेरा कानुन परिवर्तन र नयाँ कानुन निर्माणबारे उनले बुधबार कांग्रेस र नेकपा एमालेका नेतासँग परामर्श गरेका छन् । 

हाल भएका कानुन र नीति प्रभावकारी नभएको भन्दै उनले मन्त्रालय मातहत कानुन परिमार्जन, संशोधन र पुनर्निर्माण गर्न खोजेका छन् । यस अनुसार अहिले पर्यटन नीतिको नयाँ मस्यौदालाई अन्तिम रूप दिने तयारी छ । उनले सोही ऐनबारे छलफल आयोजना गरी शासकीय स्वरूप परिवर्तन भए पनि पुरानै कानुन भएका कारण मन्त्रालयका गतिविधि प्रभावकारी बन्न नसकेको जानकारी दिएका छन् । 

बुधबार उनले यसबारे राखेको छलफलमा एमाले महासचिव शंकर पोखरेलले नीति बनाउँदा सैद्धान्तिक भन्दा पनि व्यावहारिक विषयमा ध्यान दिन सुझाव दिए । नेपालको भविष्य पर्यटन क्षेत्रमा नै रहेको भन्दै उनले जलवायु परिवर्तनका विषय ऐनमा समेट्न सुझाव दिए । यस्तै कांग्रेस महामन्त्री गगन थापाले २०६५ सालको पुरानो ऐन प्रतिस्थापन गर्दै नयाँ बन्ने नीतिले सीमाङ्कनमा ध्यान दिनुपर्ने सुझाव दिए । 

नीति बनाउँदा सम्बन्धित अन्तर मन्त्रालयबीच छलफल आवश्यक रहेको उनको भनाइ छ । पर्यटन क्षेत्रमा सरकारभन्दा बढी निजी क्षेत्र सक्रिय र जिम्मेवार बन्न आवश्यक रहेको उनको भनाइ छ । महामन्त्री थापाले पर्यटन क्षेत्र विकासका लागि कति पर्यटक भित्रिएभन्दा पनि उनीहरूले नेपालमा बस्दा कुन क्षेत्रमा कति लगानी गरे, खर्च गरे भन्ने कुरा महत्त्वपूर्ण हुने उनले बताए । मन्त्री पाण्डेले सुझावलाई समेटेर कानुन परिमार्जन गर्ने बताएका छन् ।