राजश्वको इमाडोलमा छापा, चिनियाँ नाकाबाट आएको करोडौंको भेप बरामद

२८ पुस, काठमाडौं । राजश्व अनुसन्धान विभागले करोडौं रुपैयाँको इलेक्ट्रोनिक सिगरेट (भेप) बरामद गरेको छ । नेपाल–चीन सीमा नाकाबाट तस्करी भई आएको करोडौं रुपैयाँको भेप बरामद गरेको हो । गत साता ललितपुरको इमाडोल शितलहाइटको गोदाममा भण्डार गरि राखिएको अवस्थामा साे भेप बरामद गरिएको थियो ।

स्रोतका अनुसार पुष २२ गते सो कार्यमा संलग्न हुन सक्ने आशंकामा २ व्यक्ति पक्राउ गरिएपछि करोडौं रुपैयाँ बराबरको सामान बरामद भएको हो ।  शुरुमा ५०० भन्दा बढी कार्टुनमा प्याक गरिएको अवस्थामा दुई ट्रक परिमाणको सामान बरामद भएको थियो । सो भेप रमेश शेर्पा र पवन साह भनिने त्रिभुवन साहले उक्त सामान तातोपानीको नाकाबाट चोरी पैठारी गरी भन्सार छली गरि ल्याइएको आशंका गरिएको छ ।

सो भेपको बजार मूल्य अन्दाजी १५ करोड भन्दा बढी रहेको बताइएको छ । यसैगरी सशस्त्र प्रहरी निरिक्षक विजय तुलाधरको दुर्घटनामा संलग्न गाडीमा समेत १४०० थान भेप रहेको स्रोतको दावी छ । सो विषयमा  सर्लाही प्रहरी र राजश्व अनुसन्धान विभागमा पथलैयाले अनुसन्धान गरिरहेको जनाएको छ । यस्तै र बुटवल कार्यालयमा समेत भेप पक्राउ गरि अनुसन्धान जारी रहेको सशस्त्र प्रहरीले जनाएको छ ।  

केही दिनअघि मुस्ताङ प्रहरीले समेत कोरला नाकाबाट भन्सार छली गरी ल्याउँदै गरेको १९००० (उन्नाइस हजार थान) भेप आवश्यक अनुसन्धानको लागी राजश्व अनुसन्धान विभागमा बुझाएको  छ । बरामद गरिएको सबै भेपको मूल्य ५० करोडमाथि पुग्ने बताइएको छ ।